Nirav Modi Extradition: नीरव मोदीला न्यायालयाचा मोठा झटका, भारतात आणण्याचा मार्ग मोकळा

Nirav Modi Extradition: भारतातील फरारी हिरे व्यापारी नीरव मोदीचे ब्रिटनमध्ये प्रत्यार्पणाविरुद्धचे अखेरचे अपील गुरुवारी (15 डिसेंबर) फेटाळण्यात आले आहे. त्यामुळे नीरव मोदीला भारतात आणण्याचा मार्ग मोकळा झाला आहे. पंजाब नॅशनल बँकेत (PNB) मोठ्या प्रमाणात फसवणूक केल्याचा आरोप उघडकीस आल्यानंतर नीरव मोदीने 2018 मध्ये भारतातून पलायन केले होते.

दरम्यान, फसवणूक आणि मनी लाँड्रिंगच्या आरोपाखाली भारतात खटल्याला सामोरे जायचे असलेल्या नीरव मोदीला त्याच्या प्रत्यार्पणाच्या आदेशाविरुद्ध यूके सर्वोच्च न्यायालयात अपील करण्यास लंडनच्या उच्च न्यायालयाने परवानगी नाकारली आहे. प्रत्यार्पण केल्यास आत्महत्येचा धोका असल्याचा युक्तिवाद आरोपीने केला आहे. मात्र, नीरव मोदीचे अपील उच्च न्यायालयात (High Court) फेटाळण्यात आले.

उच्च न्यायालयाने हा निर्णय दिला

लंडनमधील रॉयल कोर्ट ऑफ जस्टिसमध्ये सुनावलेल्या निकालात, लॉर्ड जस्टिस जेरेमी स्टुअर्ट-स्मिथ आणि न्यायमूर्ती रॉबर्ट जे म्हणाले की, 'अपीलकर्त्याचा (नीरव मोदी) सुप्रीम कोर्टात अपील करण्यासाठी रजेचा अर्ज नाकारण्यात आला आहे.' नीरव मोदी सध्या लंडनच्या (London) वँड्सवर्थ तुरुंगात आहे. हे अपील फेटाळल्यानंतर आता आरोपीकडे प्रत्यार्पणाविरुद्ध यूकेमध्ये कोणताही कायदेशीर पर्याय उरला नाही.

बँक घोटाळा उघडकीस आल्यानंतर भारतातून पळून गेला

गेल्या महिन्यात नीरव मोदीने ब्रिटनच्या सर्वोच्च न्यायालयात भारताच्या प्रत्यार्पणाविरुद्ध अपील करण्याच्या परवानगीसाठी अर्ज दाखल केला होता. मानसिक आरोग्याच्या कारणास्तव प्रत्यार्पणाविरुद्ध 51 वर्षीय नीरव मोदीचे अपील फेटाळल्यानंतर हा अर्ज आला आहे. आरोपीचा आत्महत्येचा धोका असल्याचा युक्तिवाद न्यायालयाने फेटाळून लावला. पंजाब नॅशनल बँक (पीएनबी) घोटाळा उघड झाल्यानंतर नीरव मोदी भारतातून पळून गेला होता.