नेपाळची सेती जलविद्युत प्रकल्पासाठी भारताशी चर्चा सुरू

नेपाळने आपल्या महत्त्वाच्या पश्चिम सेती जलविद्यूत प्रकल्पासाठी भारताशी चर्चा सुरू केली आहे. याआधी नेपाळी सरकार या प्रकल्पाबाबत चीनशी चर्चा सुरू होती, मात्र आता नेपाळचे पंतप्रधान शेर बहादूर देउबा यांनी सेती जलविद्युत प्रकल्पाबाबत भारताशी चर्चा करत असल्याची माहिती दिली आहे. या प्रकल्पांतर्गत 1250 मेगावॅट वीजनिर्मिती करता येणार आहे. (Nepal in talks with India over Seti hydroelectric power plant project)

वृत्तानुसार, नेपाळने याच प्रकल्पासाठी 2012 आणि 2017 मध्ये चिनी कंपन्यांसोबत करार केले होते. आता नेपाळचे पीएम देउबा यांनी सांगितले की, पंतप्रधान नरेंद्र मोदी 16 मे रोजी लुंबिनीला येत आहेत. दरम्यान, या महत्त्वाच्या प्रकल्पासाठी त्यांच्याशी निर्णायक चर्चा होणार आहे.

सेती प्रकल्पाचे 1981 पासून काम सुरू
वृत्तानुसार, पश्चिम सेती जलविद्युत प्रकल्पाचे काम 1981 पासून सुरू आहे. 1987 मध्ये एका फ्रेंच कंपनीने प्रकल्पात बदल केला. पुढे 1994 मध्ये एका ऑस्ट्रेलियन कंपनीला प्रकल्पाचे सर्वेक्षण करण्याचा परवाना मिळाला. या प्रकल्पांतर्गत 90 टक्के वीज भारताला विकायची होती. मात्र, नंतर या प्रकल्पात चिनी कंपन्या सहभागी झाल्या.