Viral Video: 'सापांचा राजा'! जगातील सर्वात लांब विषारी सापाचा व्हिडिओ व्हायरल, एका हल्ल्यात घेऊ शकतो हत्तीचाही जीव

Malaysian King Cobra Viral Video: सोशल मीडियावर अलीकडेच एका व्हिडिओने खळबळ उडवून दिली, ज्यामध्ये एक विशाल मलेशियन किंग कोब्रा दिसत आहे. हा साप जगातील सर्वात लांब विषारी साप म्हणून ओळखला जातो. किंग कोब्राच्या विविध उप-प्रजातींमध्ये मलेशियन किंग कोब्रा त्याच्या लांबीसाठी विशेष प्रसिद्ध आहे. या प्रजातीचे नर साप 17 ते 18 फूट (सुमारे 5 मीटर) लांब असू शकतात, ज्यामुळे तो निसर्गातील सर्वात प्रभावी आणि भयानक प्राण्यांपैकी एक ठरतो.

आधी हा व्हिडिओ पाहा!

किंग कोब्रा पाहून लोक थक्क

दरम्यान, या व्हायरल व्हिडिओमध्ये (Video) एक भला मोठा मलेशियन किंग कोब्रा दिसत आहे, ज्याला एक तरुण आपल्या हातात घेऊन उभा आहे. व्हिडिओमध्ये सापाची चमकदार काळी आणि पिवळी त्वचा, त्याचे फुसफुसणे आणि त्याची ‘फणा’ पाहून लोकांचे डोळे विस्फारले आहेत.

मलेशियन किंग कोब्रा केवळ त्याच्या लांबीसाठीच नव्हे, तर त्याच्या बुद्धिमत्तेसाठीही ओळखला जातो. हा साप इतर सापांनाही खातो, म्हणूनच त्याला ‘सापांचा राजा’ (King of Snakes) असेही म्हटले जाते. त्याचे विष इतके घातक असते की ते एका प्रौढ हत्तीलाही काही तासांत ठार मारु शकते. तरीही, हा साप सहसा मानवांपासून दूर राहतो आणि धोका जाणवल्यास किंवा त्याला डिवचल्यास हल्ला करतो. या प्रजातीचे एक वैशिष्ट्य म्हणजे ती आपल्या अंड्यांच्या रक्षणासाठी घरटे बनवते, जे सापांमध्ये एक असामान्य वर्तन आहे. मादी किंग कोब्रा आपल्या अंड्यांचे संरक्षण करण्यासाठी अत्यंत आक्रमक होऊ शकते.

व्हिडिओला दीड कोटींहून अधिक व्ह्यूज

हा व्हिडिओ सोशल मीडिया (Social Media) प्लॅटफॉर्म एक्स (पूर्वीचे ट्विटर) वर @AMAZlNGNATURE नावाच्या अकाउंटवरुन शेअर करण्यात आला आहे. अवघ्या काही दिवसांतच या व्हिडिओला दीड कोटी (1.5 कोटी) पेक्षा जास्त व्ह्यूज मिळाले आहेत, तर 65 हजार लोकांनी त्याला लाईक केले आहे. व्हिडिओतील सापाची विशालता पाहून अनेकजण घाबरले आहेत. अनेकांनी या व्हिडिओवर कमेंट करुन सापाच्या भयावहतेबद्दल चर्चा केली. हा व्हिडिओ केवळ मनोरंजनाचा विषय ठरला नाही, तर त्याने जगातील सर्वात लांब आणि विषारी सापाबद्दलची माहितीही लोकांपर्यंत पोहोचवली आहे.