Gurupatwant Singh Pannu: गुरुपतवंत सिंग पन्नू प्रकरणात कोर्ट सख्त; अमेरिकन सरकारकडे मागितले पुरावे

Khalistani Terrorist Gurupatwant Singh Pannu: खलिस्तानी दहशतवादी गुरुपतवंत सिंग पन्नू याच्या हत्येचा कट रचल्याप्रकरणी न्यूयॉर्कच्या कोर्टाने अमेरिकन सरकारकडे जाब विचारला आहे. अमेरिकन जिल्हा दंडाधिकारी व्हिक्टर मॅरेरो यांनी सरकारला तीन दिवसांत सविस्तर उत्तर देण्याचे निर्देश दिले आहेत.

गुप्ता याच्यावर पन्नूच्या हत्येचा कट रचल्याचा आरोप आहे

दरम्यान, याचिकाकर्ते निखिल गुप्ता याच्या याचिकेवर न्यूयॉर्क कोर्टाने हे निर्देश दिले आहेत. निखिल गुप्ता सध्या अमेरिकन तुरुंगात आहे. गुप्ता याच्यावर पन्नूच्या हत्येचा कट रचल्याचा आरोप आहे. त्याच्यावर भारत सरकारच्या अधिकाऱ्यासोबत कट रचल्याचा आरोप आहे. मात्र, हा सरकारी अधिकारी कोण आहे हे अद्याप समजू शकलेले नाही. अमेरिकन पोलिस या सरकारी अधिकाऱ्याचा शोध घेत आहेत.

सरकारने या प्रकरणात हत्येच्या कटाशी संबंधित पुरावे सादर करावेत

दुसरीकडे, या सुनावणीदरम्यान न्यूयॉर्क कोर्टाने निखिल गुप्ताच्या याचिकेवर अमेरिकन सरकारला या प्रकरणात हत्येच्या कटाशी संबंधित पुरावे सादर करण्यास सांगितले. त्याचवेळी, सरकारी वकिलाने कोर्टात सांगितले की, निखिल गुप्ता पन्नूच्या हत्येचा कट रचत होता. गुप्ताने पैशाच्या बदल्यात ही हत्या करण्याचा कट रचल्याचा आरोप वकिलाचा होता.

याचिकाकर्ता कायद्याचे पालन करणारे भारतीय नागरिक

सुनावणीदरम्यान, गुप्ताच्या वकिलाने कोर्टात सांगितले की, याचिकाकर्ता हा इंडियन लॉ फॉलो करणारा भारतीय नागरिक आहे. त्याला या कटात गोवले जात आहे. या सर्व आरोपांमध्ये आपल्या जीवाला धोका असल्याचे गुप्ता म्हणाला होता.

निखिल 30 जूनपासून तुरुंगात आहे

निखिल गुप्ता हा भारतीय नागरिक आहे. 30 जून 2023 रोजी आरोप झाल्यानंतर त्याला चेक रिपब्लिक पोलिसांनी अटक केली. त्यानंतर अमेरिकन पोलिसांनी त्याला ताब्यात घेतले. तेव्हापासून तो अमेरिकेच्या ताब्यात आहे.