Jinnah House Attack: जिना हाऊस हल्ल्याप्रकरणी पाकिस्तानची माजी फुटबॉलपटू शुमैला सत्तारला अटक

Jinnah House Attack: पाकिस्तानची माजी फुटबॉलपटू शुमैला सत्तारला पोलिसांनी अटक केली आहे. 9 मे रोजी जिना हाऊस हल्ल्याप्रकरणी अटक करण्यात आलेल्या हजारो लोकांमध्ये तिचा समावेश आहे.

पोलिसांनी न्यायालयीन कोठडी मागितल्यानंतर शुमैलाला अटक करुन तुरुंगात पाठवण्यात आले. जिओ-फेन्सिंगद्वारे तिची ओळख पटली. लाहोर येथील तिच्या घरावर पोलिसांनी छापा टाकल्यानंतर तिला ताब्यात घेण्यात आले.

पाच JIT ची निर्मिती

यापूर्वी, पंजाबच्या गृह विभागाने लाहोरमधील (Lahore) कॉर्प कमांडर हाऊस (जिना हाऊस) वरील हल्ल्याच्या तपासासाठी पाच स्वतंत्र संयुक्त तपास पथके (जेआयटी) स्थापन केली होती. विभागाने जारी केलेल्या अधिसूचनेनुसार, पाच जेआयटी उच्च सुरक्षा क्षेत्रामध्ये तोडफोड आणि जाळपोळीची चौकशी करतील.

इम्रान खान यांचीही चौकशी करण्यात आली

दरम्यान, 9 मे रोजी झालेल्या जाळपोळ आणि तोडफोडीच्या घटनांबाबत माजी पंतप्रधान इम्रान खान यांची चौकशी केली जात आहे. JIT 9 मेच्या घटनांमध्ये इम्रान यांच्या भूमिकेची चौकशी करत आहे.

पंजाब सरकारने हिंसाचाराच्या घटनांशी संबंधित प्रकरणांची चौकशी करण्यासाठी स्वतंत्र जेआयटी स्थापन केल्या आहेत. हिंसक घटनांसंदर्भात विविध पोलिस (Polie) ठाण्यात दाखल झालेल्या गुन्ह्यांमध्ये इम्रान खान यांच्या नावाचाही समावेश आहे.

काय आहे संपूर्ण प्रकरण

इम्रान यांना 9 मे रोजी अल-कादिर ट्रस्ट प्रकरणात अटक करण्यात आली होती. त्यांच्या अटकेनंतर, पीटीआय कार्यकर्त्यांनी इस्लामाबाद, रावळपिंडी, लाहोर, कराची, गुजरांवाला, फैसलाबाद, मुलतान आणि पेशावरसह देशभरातील शहरांमध्ये हिंसक निदर्शने केली.

यादरम्यान खान यांच्या समर्थकांनी लष्करी प्रतिष्ठानांची तोडफोड करुन आग लावली. त्यानंतर पाकिस्तानच्या सर्वोच्च न्यायालयाने इम्रान खान यांची जामिनावर सुटका करण्याचे आदेश दिले होते.