VIDEO: हवेतच विमानाचं टायर फुटलं, इंजिनमध्ये घुसले रबराचे तुकडे अन्..., इराणमध्ये बोइंग 737 चं थरारक इमर्जन्सी लँडिंग; व्हिडिओ व्हायरल

Iran Sepehran Airlines Boeing 737 Accident: इराणच्या मशहद विमानतळावरुन उड्डाण करताच सेपेहरान एअरलाइन्सच्या बोइंग 737 विमानाचा हवेतच भीषण स्फोटासह टायर फुटल्याची अत्यंत धक्कादायक आणि थरारक घटना घडली. हा झटका इतका तीव्र होता की, संपूर्ण विमानाचे केबिन हादरले आणि फुटलेल्या टायरच्या रबराचे तुकडे थेट विमानाच्या धगधगत्या इंजिनमध्ये जाऊन घुसले. या अपघाताचा एक अंगावर काटा आणणारा व्हिडिओही समोर आला, ज्यामध्ये विमानाच्या केबिनचा एक भाग तुटताना दिसत असून आतील भाग प्रवाशांवर कोसळला. मृत्युच्या दारात उभे असलेले प्रवासी जिवाच्या आकांताने किंचाळत एकमेकांवर पडत होते आणि देवाचा धावा करत होते.

इराणच्या (Iran) मशहद शहरातील शहीद हाशमीनेजाद आंतरराष्ट्रीय विमानतळावरुन करमानशाह शहराकडे जाण्यासाठी या विमानाने टेकऑफ केले होते. रनवेवरुन उड्डाण करेपर्यंत सर्व काही सुरळीत सुरु होते; मात्र, जशी विमानाने हवेत गती पकडली, तसा विमानात अचानक बॉम्बस्फोट झाल्यासारखा मोठा आवाज झाला. क्षणात विमानाचे संतुलन बिघडले, केबिनमधील लाईट्स मंद झाल्या आणि विमानाचे दोन तुकडे होऊन ते कोणत्याही क्षणी खाली कोसळेल अशी परिस्थिती निर्माण झाली. विमानातील सर्व प्रवाशांना आज आपल्या आयुष्याचा शेवटचा दिवस असल्याचे वाटू लागले होते.

मात्र, अशा अत्यंत गंभीर आणि भयानक परिस्थितीत विमानाच्या वैमानिकांनी अभूतपूर्व प्रसंगावधान आणि कौशल्याचे दर्शन घडवले. एका बाजूचे इंजिन पूर्णपणे निकामी झाले असताना आणि टायर फुटलेले असतानाही, वैमानिकाने तात्काळ मशहद विमानतळाच्या एअर ट्रॅफिक कंट्रोलशी संपर्क साधून इमर्जन्सी घोषित केली. विमानतळ प्रशासनाने लगेचच रेड अलर्ट जारी केला. वैमानिकाने अत्यंत कौशल्याने आणि धैर्याने डॅमेज झालेल्या विमानाची पुन्हा मशहद विमानतळावर सुरक्षित इमर्जन्सी लँडिंग घडवून आणली. वैमानिकाच्या सतर्कतेमुळे विमानातील सर्व प्रवाशांचे प्राण वाचले असून मोठ्या विमानाचा भीषण अपघात टळला.