Hardeep Singh Nijjar Murder: 'तपासाविनाच भारताला दोषी ठरवले...', भारतीय राजदूतांनी कॅनडाला दिले चोख प्रत्युत्तर

Indian Ambassador on Canada: खलिस्तानी दहशतवादी हरदीपसिंग निज्जरच्या हत्येचा भारतावर आरोप करणाऱ्या कॅनडा सरकारला भारतीय राजदूताने चोख प्रत्युत्तर दिले आहे. ते म्हणाले की, कॅनडाने तपास न करता भारतावर आरोप केले.

भारताचे कॅनडातील उच्चायुक्त संजय कुमार वर्मा यांनी तीव्र आक्षेप घेतला आहे. कॅनडाचे पंतप्रधान जस्टिन ट्रुडो यांनी दिलेल्या प्रत्येक पुराव्याचा भारत गांभीर्याने विचार करेल, असेही ते म्हणाले. ते पुढे म्हणाले की, या हत्या प्रकरणात भारताने सहकार्य नाकारले नाही.

तुमच्याकडे काही ठोस पुरावे असतील तर ते आम्हाला द्या, असे भारताने नेहमीच म्हटले आहे. कॅनडाच्या आरोपांवरही त्यांनी नाराजी व्यक्त केली. यालाच इथे (कॅनडामध्ये) कायद्याचे राज्य म्हणतात का, असा सवालही त्यांनी उपस्थित केला. त्यांनी कॅनडाला त्यांच्या आरोपांचे समर्थन करण्यासाठी पुरावे देण्यास सांगितले.

दरम्यान, कॅनडाच्या (Canada) एका वृत्तवाहिनीशी बोलताना त्यांनी या गोष्टी सांगितल्या. या मुलाखतीत कॅनडाच्या अँकरने त्यांना विचारले की, जर निज्जरच्या हत्येत भारताचा हात नाही तर तो तपासापासून का पळत आहे.

यावर संजय कुमार म्हणाले की, भारत कधीच पळून गेला नाही. याला तुम्ही कायद्याचे राज्य म्हणता का, ज्यामध्ये कोणाला तरी चौकशी न करता दोषी ठरवले जाते, असा सवाल त्यांनी केला. जर तुम्ही एखाद्यावर दोषारोप केला आणि त्याला सहकार्य करण्यास सांगितले तर तो कसा प्रतिसाद देईल?

दोन्ही देशांमध्ये तणावाचे कारण काय?

कॅनडाच्या आरोपानंतर भारत (India) आणि कॅनडाचे संबंध बिघडले आहेत. कॅनडाचे पंतप्रधान जस्टिन ट्रूडो यांनी कॅनडाच्या भूमीवर खलिस्तानी दहशतवादी हरदीपसिंग निज्जरच्या हत्येमध्ये भारताचा हात असल्याचा आरोप केल्यावर त्याची सुरुवात झाली.

भारताने कॅनडाचे आरोप फेटाळले असून ते खोटे असल्याचे म्हटले आहे. यानंतर कॅनडाने एका वरिष्ठ भारतीय राजनयिकाला देश सोडण्यास सांगितले. दुसरीकडे, भारतानेही तात्काळ कारवाई करत कॅनडाच्या एका राजनयिकाची हकालपट्टी केली.

भारताने कॅनडाची व्हिसा सेवाही रद्द केली आणि त्यांच्या 41 राजनयिकांना देश सोडण्यास सांगितले. 18 जून रोजी हरदीपसिंग निज्जरची कॅनडातील सरे येथील गुरुद्वाराबाहेर गोळ्या झाडून हत्या करण्यात आली होती.