Bangladesh: प्रेषित मोहम्मद पैगंबरांच्या विरोधात आक्षेपार्ह पोस्ट करणाऱ्या हिंदू विद्यार्थ्याला बांगलादेशात अटक

बांगलादेश: प्रेषित मोहम्मद पैगंबरांचा अपमान केल्याच्या आरोपाखाली हिंदू विद्यार्थ्याला बांगलादेशमध्ये अटक करण्यात आली आहे. सिल्हेट भागातील मौलवीबाजार सदर उपजिल्हा येथे ही घटना घडली. विकास धर दीप्ता असे अटक करण्यात आलेल्या हिंदू विद्यार्थ्याचे नाव आहे.

समोर आलेल्या माहितीनुसार, २३ वर्षीय विकास धर बांगलादेशमधील शाहजलाल विज्ञान आणि तंत्रज्ञान विद्यापीठात अर्थशास्त्राचे शिक्षण घेत आहे. शुक्रवारी त्याला न्यायालयासमोर हजर करण्यात आले होते. विकासने ११ मे रोजी प्रेषित मोहम्मद पैगंबर यांच्या विरोधात फेसबुकवरुन आक्षेपार्ह पोस्ट केली होती. यानंतर मुस्लिम सुदायाने याप्रकरणी आक्षेप नोंदवत कारवाईची मागणी केली होती.

विकासच्या या पोस्टमुळे सिल्हेट भागातील मौलवीबाजार सदर उपजिल्हा येथे तणावाची परिस्थिती निर्माण झाली होती. सायबर सुरक्षा कायद्याअंतर्गत विकासला पोलिसांनी अटक केली. याप्रकरणी अब्दुल कादिर रतन यांनी पोलिसांत तक्रार दाखल केली होती.

बांगलादेश हायकोर्टाने इशनिंदा करणाऱ्या विरोधात कडक कारवाई करण्याचे आदेश जारी केले होते. यात जन्मठेप तसेच मृत्यूदंडाची शिक्षेचा देखील समावेश आहे.

स्थानिक माध्यमांनी दिलेल्या वृत्तानुसार, अब्दुल कादिर रतन यांच्या तक्रारीच्या आधारे विकास धर याला अटक करण्यात आली आहे. पोलिस या प्रकरणाचा तपास करत असून, विकासवर कायद्यानुसार योग्य ती कारवाई केली जाईल, असे पोलिसांनी म्हटले आहे. दरम्यान, या परिसरात तणावाची परिस्थिती निर्माण झाल्यानंतर कायदा आणि सुव्यवस्थेचा प्रश्न निर्माण होऊ नये म्हणून मोठा पोलिस फौजफाटा या ठिकाणी तैनात करण्यात आला होता.