पाकिस्तानी गुप्तचर यंत्रणेसाठी हेरगिरी; दोन भारतीय जवानांना अटक

चंडीगड : आयएसआय (ISI) या पाकिस्तानी (Pakistan) गुप्तचर यंत्रणेशी संधान साधत हेरगिरी केल्याच्या आरोपावरुन भारतीय लष्करातील दोन जवानांना अटक (Arrested) करण्यात आल्याचे पंजाब पोलिसांनी सांगितले आहे. हरप्रीतसिंग (Harpreet Singh) आणि गुरभेजसिंग (Gurbhejsing) अशी या जवानांची नावे आहेत. पैकी हरप्रीतसिंग हा 19 राष्ट्रीय रायफल्समधील जवान असून त्याला जम्मू काश्मीरच्या अनंतनाग (Anantnag) जिल्ह्यामध्ये तैनात करण्यात आले होते. तर गुरभेजसिंग हा 18 व्या शीख लाइट इन्फण्ट्रीमधील जवान असून त्याला कारगिलमध्ये कारकून या पदावर तैनात करण्यात आले होते.

देशाच्या राष्ट्रीय सुरक्षेशी आणि संरक्षणविषयक संबंधित 900 हून अधिक दस्तऐवज या दोन्ही आरोपींनी फेब्रुवारी ते मे 2019 या कालावधीमध्येच सीमेपलीकडून अमली पदार्थ तस्कर रणवीरसिंग (Ranveer Singh) याच्याकडे यापूर्वीच सुपुर्द केला असल्याचे पंजाब पोलिस महासंचालक दिनकर गुप्ता (Dinkar Gupta) यांनी सांगितले आहे. रणवीरसिंगने त्याला मिळालेले दस्ताऐवज पाकिस्तानची गुप्तचर यंत्रणा असलेल्या आयएसआयकडे सुपुर्द केले. रणवीरसिंग याची जालंधर ग्रामीण पोलिसांनी चौकशी केली होती. त्यावेळी त्याच्याकडून गोपनीय दस्तऐवज जप्त केला होता.