Elon Musk World First Trillionaire Net Worth: जगाच्या कॉर्पोरेट इतिहासात एक अभूतपूर्व आणि ऐतिहासिक अध्याय जोडला गेला, ज्याची कल्पना काही वर्षांपूर्वीपर्यंत अशक्य वाटत होती. प्रसिद्ध उद्योगपती एलन मस्क आता अधिकृतरित्या जगातील पहिले 'ट्रिलियनेयर' बनले. त्यांची एकूण संपत्ती 1000 अब्ज डॉलरपेक्षा जास्त झाली. मस्क हे आजच्या काळातील अशा मोजक्या व्यावसायिकांपैकी एक आहेत, जे केवळ उद्योग जगतातच नव्हे, तर इंटरनेट आणि सोशल मीडिया कल्चरचाही एक मोठा चेहरा आहेत.
जागतिक स्तरावर श्रीमंत आणि गरिबांमधील वाढत्या दरीवरुन वाद सुरु असतानाच मस्क यांनी हे अफाट यश संपादन केले. मस्क यांचे प्रशंसक त्यांच्या सोशल मीडियावरील स्पष्टवक्तेपणासाठी त्यांना पसंत करतात. त्यांच्या कंपन्यांच्या कामकाजाच्या पद्धतीवर अनेकदा टीका झाली असून, अलीकडच्या काळातील त्यांच्या राजकीय हस्तक्षेपामुळे अनेक वादही निर्माण झाले आहेत. मात्र, या सर्व वादांचा त्यांच्या व्यावसायिक साम्राज्यावर कोणताही नकारात्मक परिणाम झालेला नाही. त्यांची अंतराळ संशोधन कंपनी 'स्पेसएक्स'ने आयपीओच्या माध्यमातून बाजारातून तब्बल 75 अब्ज डॉलरचा विक्रमी निधी उभारला, ज्यामुळे जगभरातील गुंतवणूकदारांचा मस्क यांच्या दूरदृष्टीवर असलेला अढळ विश्वास पुन्हा एकदा सिद्ध झाला.
स्पेसएक्सच्या आयपीओपूर्वी 'फोर्ब्स' मासिकाने मस्क यांची नेटवर्थ सुमारे 780 अब्ज डॉलर एवढी अंदाजित केली होती, ज्यासह ते जगातील सर्वात श्रीमंत व्यक्तींच्या यादीत पहिल्या क्रमांकावर होते. दुसऱ्या क्रमांकावर असलेले गुगलचे सह-संस्थापक लॅरी पेज हे मस्क यांच्यापेक्षा खूपच मागे आहेत. लॅरी पेज यांच्याकडे 300 अब्ज डॉलरची संपत्ती असून, ती मस्क यांच्या एकूण संपत्तीच्या एक तृतीयांशपेक्षाही कमी आहे.
स्पेसएक्सच्या यशस्वी लिस्टिंगनंतर मस्क यांच्या संपत्तीचा एक मोठा हिस्सा याच कंपनीतून येत आहे, ज्यातील त्यांची भागीदारी आता 866 अब्ज डॉलरवर पोहोचली. टेस्ला आणि त्यांच्या इतर कंपन्यांची मूल्ये मिळून शुक्रवारी जेव्हा बाजार उघडला, तेव्हा मस्क यांची एकूण संपत्ती 1.1 ट्रिलियन डॉलर म्हणजेच भारतीय चलनात सुमारे 91 लाख कोटी रुपयांच्या पार गेली. मस्क यांनी यापूर्वी टेस्ला आणि स्पेसएक्सच्या माध्यमातून जगभरात आपली ओळख निर्माण केली होती, परंतु 2022 मध्ये त्यांनी 'ट्विटर' 44 अब्ज डॉलरला खरेदी करुन संपूर्ण जगाला थक्क केले होते.
गेल्या अनेक दिवसांपासून एलन मस्क (Elon Musk) आपली अंतराळ कंपनी स्पेसएक्स शेअर बाजारात उतरवणार असल्याची चर्चा होती. हा आयपीओ बाजारात येताच गुंतवणूकदारांनी त्यावर पैशांचा पाऊस पाडला. बाजार तज्ज्ञांना वाटत होते की मस्क यांची इलेक्ट्रिक कार कंपनी 'टेस्ला' त्यांना या ऐतिहासिक मुक्कामापर्यंत पोहोचवेल, परंतु स्पेसएक्सने बाजी मारली. कंपनीचा 'स्टारलिंक' सॅटेलाइट इंटरनेट व्यवसाय आणि भविष्यातील 'मंगळ ग्रह' (Mars Mission) मोहीम याबद्दल गुंतवणूकदारांमध्ये कमालीचा उत्साह आहे. लिस्टिंगच्या पहिल्याच दिवशी शेअर्समध्ये झालेल्या प्रचंड वाढीमुळे मस्क यांच्या संपत्तीचा आलेख गगनाला भिडला.
सोप्या भाषेत सांगायचे तर, एक ट्रिलियन डॉलर ही इतकी मोठी रक्कम आहे की ती अनेक विकसित देशांच्या एकूण जीडीपीपेक्षाही जास्त आहे. मस्क यांनी ॲमेझॉनच्या जेफ बेझोस आणि बर्नार्ड अरनॉल्ट सारख्या दिग्गज अब्जाधीशांना खूप मागे टाकले. 'एक्स' खरेदीनंतरचे वाद आणि टेस्लाच्या शेअर्समधील चढ-उतार या सर्व आव्हानांवर मात करत मस्क यांनी हे यश मिळवले.
दैनिक गोमंतकचे सदस्य व्हा
शॉपिंगसाठी 'सकाळ प्राईम डील्स'च्या भन्नाट ऑफर्स पाहण्यासाठी क्लिक करा.
Read Goa news in Marathi and Goa local news on Tourism, Business, Politics, Entertainment, Sports and Goa latest news in Marathi on Dainik Gomantak. Get Goa news live updates on the Dainik Gomantak Mobile app for Android and IOS.