Congo: धगधगती घरे अन् किंकाळ्यांनी हादरले 'कांगो'! दहशतवाद्यांनी 43 निष्पापांचा घेतली जीव; युगांडा सीमेवर पुन्हा रक्ताची होळी

Allied Democratic Forces ADF Attack Congo: पूर्व काँगोमध्ये इस्लामिक स्टेटशी संबंधित असलेल्या 'अलाईड डेमोक्रेटिक फोर्सेस' या दहशतवादी संघटनेने अत्यंत भीषण हल्ला केला. बुधवारी रात्री उशिरा झालेल्या या हल्ल्यात 43 निष्पाप नागरिकांची निर्घृण हत्या करण्यात आल्याची माहिती समोर आली असून स्थानिक सूत्रांच्या मते मृतांचा आकडा 56 पेक्षा जास्त असण्याची शक्यता आहे. बाफवाकोआ या गावात शिरुन दहशतवाद्यांनी हा नरसंहार घडवून आणला असून या घटनेमुळे संपूर्ण परिसरात दहशतीचे आणि भीतीचे वातावरण पसरले आहे.

मिळालेल्या माहितीनुसार, युगांडा आणि काँगो (Congo) या दोन्ही देशांच्या सीमेवर सक्रिय असलेल्या एडीएफच्या दहशतवाद्यांनी रात्रीच्या अंधाराचा फायदा घेऊन बाफवाकोआ गावावर हल्ला चढवला. दहशतवाद्यांनी केवळ लोकांवर गोळीबारच केला नाही, तर अनेक घरांना आग लावून ती भस्मसात केली. स्थानिक नागरी समाजाचे प्रतिनिधी सैमुअल बनापिया यांनी दिलेल्या माहितीनुसार, अनेक लोक अजूनही बेपत्ता असून किमान दोन जणांना दहशतवाद्यांनी ओलीस ठेवले आहे. काँगोच्या लष्कराने या हल्ल्याची पुष्टी करताना 43 जणांचा मृत्यू झाल्याचे म्हटले असले तरी, मृतांच्या संख्येत वाढ होण्याची भीती व्यक्त केली जात आहे.

काँगोचे लष्कर सध्या पूर्व भागात अनेक बंडखोर गटांशी झुंज देत आहे. यामध्ये रवांडाचे समर्थन असलेल्या 'M23' या प्रमुख गटासह एडीएफसारख्या क्रूर संघटनांचा समावेश आहे. गेल्या वर्षी M23 गटाने पूर्व भागातील काही महत्त्वाच्या शहरांवर ताबा मिळवला होता, ज्यामुळे लष्करासमोर मोठी आव्हाने उभी ठाकली आहेत. लष्करी प्रवक्ते लेफ्टिनेंट जूल्स न्गोंगो यांनी सांगितले की, एडीएफचे दहशतवादी लष्कराशी थेट समोरासमोर लढण्याचे टाळतात आणि त्याऐवजी मवाळ लक्ष्यांवर, म्हणजेच सामान्य नागरिकांवर हल्ले करतात. अशा अमानवीय हल्ल्यांमुळे या भागात सुरु असलेल्या शांतता प्रक्रियेला मोठा धक्का बसत आहे.

एडीएफ या संघटनेची युगांडाच्या (Uganda) सीमेजवळ मोठी ताकद असून, गेल्या काही वर्षांत त्यांच्या हिंसक कारवायांमध्ये प्रचंड वाढ झाली आहे. गेल्या वर्षीही या संघटनेने एका शेजारील प्रांतात 66 लोकांची हत्या करुन अनेकांना ओलीस ठेवले होते. पूर्व काँगोमधील दुर्गम भाग आणि जंगलांचा फायदा घेऊन हे दहशतवादी सातत्याने नागरिकांना लक्ष्य करत आहेत. सध्या लष्कराने बाफवाकोआ आणि आसपासच्या परिसरात शोधमोहीम तीव्र केली असून बेपत्ता नागरिकांचा शोध घेतला जात आहे. या हल्ल्याने जागतिक स्तरावर पुन्हा एकदा इस्लामिक स्टेटशी संबंधित संघटनांच्या वाढत्या धोक्याची जाणीव करुन दिली आहे.