Greece: निर्वासितांच्या वाट्याला अखेर मरणचं! ग्रीसमध्ये 400 प्रवाशांसह जहाज बुडाले 79 जणांचा मृत्यू

Greece: ग्रीसमध्ये एक जहाज बुडून 79 लोक मृत्यू पावल्याची धक्कादायक माहीती समोर आली आहे. दक्षिणी पेलोपोनिसे क्षेत्रापासून जवळजवळ 75 किलोमीटर दूर ही घटना घडली आहे.

या घटनेत आतापर्यत 79 लोकांचा मृत्यू झाला आहे तर शेकडो लोक बेपत्ता झाल्याची माहीती समोर आली आहे. या घटनेची माहीती मिळताच तत्काळ रेस्क्यू ऑपरेशन सुरु करण्यात आले आहे.

आत्तापर्यत 104 लोकांना वाचवण्यात यश आले असून अजूनही हे बचावकार्य सुरु आहे. या पीडीतांना उपचारासाठी पाठवण्यात आले आहे. या प्रवाशांमध्ये विविध देशांच्या नागरिकांचा समावेश होता. इजिप्तचे 30 , पाकिस्तानचे 10 , सिरियाचे 35 आणि दोन पॅलेस्टाइनचे नागरिक आहेत. हे नागरिक निर्वासित असल्याची माहीती समोर आली आहे.

तटरक्षक दलाच्या म्हणण्यानुसार, जहाजातले किती लोक बेपत्ता आहेत याची हे नेमके सांगता येणार नाही, या बचावकार्यात तटरक्षक दल नौसेना आणि वायूसेनेचा देखील समावेश आहे. इटलीला चाललेले हे जहाज लीबीयाच्या टोब्रुकमधून रवाना झाल्याची माहीती समोर आली आहे.

वाचवलेल्या लोकांना कलामाता शहरात घेऊन जात आहेत. कलामाता येथील महापौर म्हणाले, या लोकांचे वय 16 ते 41 दरम्यान आहे. या जहाजात महिला आणि लहान मुलांचादेखील समावेश आहे.

संयुक्त राष्ट्रांने ट्वीट करत म्हटले आहे की, जहाजात 400 लोक होते. संयुक्त राष्ट्रांचे महासचिव एंटोनियो गुटेरेस यांनी जहाज बुडण्याची घटना भयावह असल्याचे म्हटले आहे.