Charles Sobhraj : 'बिकिनी किलर' चार्ल्स शोभराजची होणार सुटका, 19 वर्षांपासून तुरुंगात बंद

Nepal News: नेपाळच्या सर्वोच्च न्यायालयाने फ्रेंच सीरियल किलर चार्ल्स शोभराजच्या सुटकेचे आदेश दिले आहेत. शोभराजला वयाच्या आधारावर सोडण्यात आले आहे. हत्येच्या आरोपाखाली तो 2003 पासून नेपाळी तुरुंगात बंद आहे. त्याची सुटका झाल्यानंतर 15 दिवसांत त्याला हद्दपार करण्याचे आदेशही न्यायालयाने दिले आहेत. गुन्हेगारी जगतात 'बिकिनी किलर' आणि 'सिरियल किलर' म्हणून ओळखल्या जाणाऱ्या शोभराजवर भारत, थायलंड, तुर्की आणि इराणमध्ये 20 हून अधिक लोकांची हत्या केल्याचा आरोप आहे.

दरम्यान, शोभराजवर 1975 मध्ये नेपाळमध्ये जाण्यासाठी बनावट पासपोर्टचा (Passport) वापर करुन अमेरिकन नागरिक कोनी जो बोरोन्झिच आणि त्याची कॅनेडियन मैत्रीण लॉरेंट कॅरियर या दोन पर्यटकांची हत्या केल्याचा आरोप होता.

2003 मध्ये अटक करण्यात आली होती

1 सप्टेंबर 2003 रोजी एका वृत्तपत्राने त्याचा फोटो प्रकाशित केल्यानंतर शोभराज नेपाळमधील कॅसिनोबाहेर दिसला होता. त्याच्या अटकेनंतर पोलिसांनी (Police) त्याच्याविरुद्ध 1975 मध्ये काठमांडू आणि भक्तपूर येथे दाम्पत्याच्या हत्येचे दोन वेगवेगळे गुन्हे दाखल केले होते. तो काठमांडूच्या मध्यवर्ती कारागृहात 21 वर्षांची शिक्षा भोगत आहे. अमेरिकन नागरिकाच्या हत्येप्रकरणी त्याला 20 वर्षे आणि बनावट पासपोर्ट वापरल्याबद्दल एक वर्षाची शिक्षा सुनावण्यात आली होती.