Trump India Tariffs: अमेरिकेचे राष्ट्राध्यक्ष डोनाल्ड ट्रम्प यांनी भारतावर लावलेल्या नव्या आयात शुल्कावरुन (Tariffs) आता अमेरिकेतच त्यांच्यावर जोरदार टीका सुरु झाली आहे. ट्रम्प यांच्या या 'टॅरिफ वॉर'मुळे अनेक वर्षांच्या प्रयत्नांनी निर्माण झालेल्या अमेरिका-भारत संबंधांना मोठा धक्का बसू शकतो, असा इशारा अमेरिकन खासदारांनी दिला आहे.
अमेरिकेच्या (America) हाऊस फॉरेन अफेअर्स कमिटीचे सदस्य असलेले डेमोक्रॅटिक खासदार ग्रेगरी मीक्स (Gregory Meeks) यांनी ट्रम्प यांच्या धोरणावर तीव्र आक्षेप घेतला. मीक्स म्हणाले की, ट्रम्प यांची ही 'टॅरिफ तानाशाही' अमेरिका आणि भारत यांच्यातील अनेक वर्षांच्या मेहनतीने तयार झालेल्या रणनीतिक भागीदारीला नुकसान पोहोचवू शकते.
ग्रेगरी मीक्स यांनी पुढे सांगितले की, अमेरिका आणि भारत यांच्यात खोलवर रुजलेले रणनीतिक, आर्थिक आणि सामाजिक संबंध आहेत. अशा परिस्थितीत कोणताही वाद किंवा चिंता असल्यास त्याचे निराकरण लोकशाही मूल्यांनुसार आणि दोन्ही देशांचा परस्पर आदर राखत केले पाहिजे. ट्रम्प यांची कठोर नीती त्या संबंधांना खराब करु शकते, जे अनेक वर्षांच्या प्रयत्नांनी तयार झाले आहेत, असा गंभीर इशारा त्यांनी दिला.
ट्रम्प यांच्या धोरणावर टीका करणारे ग्रेगरी मीक्स एकटेच नाहीत. याआधी रिपब्लिकन पार्टीच्या भारतवंशी नेत्या निक्की हेली (Nikki Haley) यांनीही ट्रम्प यांच्यावर टीका केली होती. त्यांनी म्हटले होते की, अमेरिकेने भारतासारख्या मजबूत भागीदारासोबतचे संबंध खराब करु नयेत. उलट चीनसारख्या देशाला सूट देऊ नये. त्यांनी ट्रम्प यांनी लावलेल्या शुल्क आणि रशियन तेलाच्या खरेदीवरुन भारतावर केलेल्या हल्ल्यांनंतर हे वक्तव्य केले होते.
दुसरीकडे, या संपूर्ण प्रकरणावर चीनने भारताला समर्थन दिले आहे, हे विशेष आहे. चीनच्या विदेश मंत्रालयाचे प्रवक्ते गुओ जियाकुन (Guo Jiakun) यांनी अमेरिकेचे राष्ट्राध्यक्ष डोनाल्ड ट्रम्प यांच्या या भूमिकेला 'व्यापारिक नियमांचा दुरुपयोग' म्हटले. चीन नेहमीच टॅरिफच्या गैरवापराला विरोध करत आला आहे. असेही त्यांनी सांगितले. या घडामोडींवरुन हे स्पष्ट होते की, ट्रम्प यांच्या 'टॅरिफ वॉर'ला केवळ भारतातूनच (India) नव्हे, तर त्यांच्या स्वतःच्या देशातून आणि जागतिक स्तरावरही विरोध होत आहे.
दैनिक गोमंतकचे सदस्य व्हा
शॉपिंगसाठी 'सकाळ प्राईम डील्स'च्या भन्नाट ऑफर्स पाहण्यासाठी क्लिक करा.
Read Goa news in Marathi and Goa local news on Tourism, Business, Politics, Entertainment, Sports and Goa latest news in Marathi on Dainik Gomantak. Get Goa news live updates on the Dainik Gomantak Mobile app for Android and IOS.