Pakistan Bus Accident: बलुचिस्तानमध्ये बस दरीत कोसळून 40 प्रवासी ठार

Pakistan Bus Accident: पाकिस्तानच्या बलुचिस्तानमध्ये एक मोठी दुर्घटना घडली आहे. बलुचिस्तानमध्ये रविवारी प्रवाशांनी भरलेली बस खोल दरीत कोसळली. या अपघातात 40 प्रवाशांचा मृत्यू झाला आहे. मदत आणि बचावकार्यासाठी पोलिस आणि मदत कर्मचार्‍यांचे पथक घटनास्थळी पोहोचले आहे. मदत आणि बचाव कार्य सुरू आहे.

बलुचिस्तानमधील लासबेला भागात हा अपघात झाल्याचे सांगण्यात येत आहे. पाकिस्तानी प्रसारमाध्यमांनी दिलेल्या माहितीनुसार, खड्ड्यात पडलेल्या बसमध्ये सुमारे 48 प्रवासी होते. बस क्वेटाहून कराचीला जात होती. लासबेला जिल्ह्यातील बेला भागात एका ठिकाणी यू-टर्न घेत असताना बस पुलाच्या पिलरला धडकली, असे सांगण्यात येत आहे.

पुलाच्या पिलरला धडकल्याने चालकाचे बसवरील नियंत्रण सुटले. त्यानंतर प्रवाशांनी भरलेली बस खड्ड्यात पडली. खड्ड्यात पडलेल्या बसलाही आग लागली. लासबेला येथील सहाय्यक आयुक्त हमजा अंजुम यांनी अपघाताच्या घटनेला दुजोरा दिला आहे. बचाव कार्याचीही त्यांनी माहिती दिली आहे.

हमजा अंजुम यांनी सांगितले की, बसमधील एक बालक आणि एका महिलेसह तीन जणांना वाचवण्यात आले आहे. तिघांनाही उपचारासाठी रुग्णालयात दाखल करण्यात आले आहे. बसमधील नेमके किती प्रवासी होते, याची माहिती मिळालेली नाही.

बस खोल दरीत कोसळल्यानंतर मोठा आवाज झाला. घटना घडली शेजारून ये-जा करणाऱ्यांसह आसपासच्या नागरिकांचीही घटनास्थळी गर्दी होती. लोकांनी अपघाताची माहिती पोलीस आणि इतर संबंधित विभागांना दिली. बसमधून आतापर्यंत 19 प्रवाशांचे मृतदेह बाहेर काढण्यात आले आहेत.