Earthquake In Pakistan: अफगाणिस्तान-पाकिस्तानमध्ये जाणवले भूकंपाचे धक्के, रिश्टल स्केलवर 6.5 तीव्रता

Earthquake In Pakistan: अफगाणिस्तानच्या हिंदुकुश भागात मंगळवारी म्हणजेच 21 मार्चला रात्री 6.5 तीव्रतेचा भूकंप झाला. भूकंपाचे धक्के अफगाणिस्तानसह पाकिस्तान आणि भारतामध्येही जाणवले. 

पाकिस्तान आणि अफगाणिस्तानमध्ये भूकंपामुळे मोठे नुकसान झाले आहे. अफगाणिस्तानमध्ये झालेल्या भूकंपात आतापर्यंत 10 जणांचा मृत्यू झाला आहे.

तर पाकिस्तानमध्ये भूकंपामुळे 2 महिलांसह 9 जणांचा मृत्यू झाला आहे. टोलो न्यूजच्या वृत्तानुसार, पाकिस्तानमध्ये 160 लोक जखमी झाले आहेत. 

अफगाणिस्तानमध्ये, गृहमंत्री सिरजाउद्दीन हक्कानी यांनी सर्व 34 प्रांतांचे राज्यपाल आणि देशभरातील पोलीस प्रमुखांना भूकंपामुळे प्रभावित झालेल्या सर्व लोकांना मदत आणि सहकार्य करण्याचे निर्देश दिले आहेत.

अफगाणिस्तानची राजधानी काबूल तसेच इस्लामाबाद आणि लाहोरसह अनेक पाकिस्तानी शहरांमध्ये भूकंपाचे धक्के जाणवले.

यूएस जिओलॉजिकल सर्व्हेनुसार, मंगळवारी रात्री झालेल्या भूकंपाचा उगम पृष्ठभागाच्या 187 किमी खाली होता. 100 किमी किंवा त्यापेक्षा कमी खोलीवर उगम पावलेल्या हिंदुकुश प्रदेशात खोलवर भूकंप होतात. खोल भूकंप, पुरेसे मजबूत असल्यास, मोठ्या भौगोलिक भागात जाणवतात.

पाकिस्तानात घराचे छत पडले

'द एक्स्प्रेस ट्रिब्यून' या वृत्तपत्राने भूकंपाच्या वेळी रावळपिंडीतील एका बाजारात चेंगराचेंगरी झाल्याचे वृत्त दिले आहे. खैबर-पख्तुनख्वा प्रांतातील स्वाबी येथे घराचे छत कोसळल्याने एकाच कुटुंबातील किमान पाच जण जखमी झाल्याचे वृत्तात म्हटले आहे.

भारतातही भूकंपाचे धक्के

हरियाणा, पंजाब, राजस्थान, जम्मू-काश्मीरमध्येही भूकंपाचे धक्के जाणवले. एका अधिकाऱ्याने सांगितले की, भूकंपानंतर लगेचच जम्मू प्रदेशातील काही भागात मोबाईल सेवा विस्कळीत झाली.

NCS नुसार, भूकंपाचा केंद्रबिंदू 156 किमी खोलीवर 36.09 अंश उत्तर अक्षांश आणि 71.35 अंश पूर्व रेखांशावर होता. उत्तरकाशी आणि चमोलीसह उत्तराखंडमध्येही अनेक ठिकाणी भूकंपाचे धक्के जाणवले.

दिल्लीचे मुख्यमंत्री अरविंद केजरीवाल यांनी ट्विट केले की, "दिल्ली-एनसीआरमध्ये भूकंपाचे जोरदार धक्के जाणवले. आशा आहे की तुम्ही सर्व सुरक्षित असाल." पूर्व दिल्लीतील शकरपूरमध्ये भूकंपाच्या धक्क्यांनंतर लोक घराबाहेर पडले.

काही लोकांनी दावा केला की इमारत झुकली आहे, परंतु ही माहिती खोटी निघाली. अधिका-यांनी सांगितले की, आग्नेय दिल्लीतील जामिया नगर येथे इमारतीला झुकल्याची माहिती मिळाल्यानंतर अग्निशमन दलाच्या दोन गाड्या रवाना करण्यात आल्या.