Goa: माजी मुख्यमंत्री दिगंबर कामत यांच्‍या घरीही गणेश चतुर्थीचा उत्‍साह!

Ganesh Festival: गोव्यात घरगुती गणपतीचा उत्सव दीड दिवसांचा असतो, मात्र उत्साह अमाप असतो. मडगावचे आमदार आणि राज्याचे माजी मुख्यमंत्री दिगंबर कामत यांच्या घरी गणेश चतुर्थी उत्सवाचे आयोजन अशाच मोठ्या उत्साहाने करण्यात आले.

या उत्सवानिमित्त कामत यांचे आके येथील घर तीन दिवस गजबजून गेले होते. कामत यांच्या असंख्य समर्थकांनी त्यांच्या घराला भेट देऊन श्री गजाननाचे दर्शन घेतले. त्यांची सरबराई करण्यात त्यांचे सर्व कुटुंब व्यस्त होते. या उत्सवानिमित्ताने लोक आमच्या घरी आवर्जून भेट देतात. त्यांचे हे प्रेम ऊर भरवणारे असते अशी प्रतिक्रिया कामत यांनी व्यक्त केली.

गणपती पूजनाच्या पहिल्या दिवशी सकाळी पुरोहिताकडून गणपती स्थापना आणि पूजनाचा धार्मिक विधी आटोपण्यात आला. या निमित्ताने सायंकाळी श्री सत्यनारायण पूजाही झाली. या दीड दिवसांच्या गणेश पूजनात त्यांच्या पत्नी आशा कामत, पुत्र योगीराज व कुटुंबाच्या इतर सदस्यांनी सहभाग घेतला. रात्री त्याच उत्साहात श्रींचे विसर्जन करण्‍यात आले.