Women In Manipur Stopping The Army Colonel By Falling At His Feet:
मणिपूरमधील आणखी एक व्हिडिओ सोशल मीडियावर व्हायरल झाला आहे. ज्यामध्ये कुकी समाजातील असंख्य महिला भारतीय लष्करातील कर्नल दर्जाच्या अधिकाऱ्याच्या पाया पडून त्यांना थांबवत आहेत.
या महिला अधिकाऱ्यासमोर नतमस्तक होऊन रडत आहेत आणि त्यानंतर आसाम रायफल्सच्या आभाराच्या घोषणाही देत आहेत.
या महिला असे का करत आहेत आणि हा व्हिडिओ कधीचा आहे, याची खात्री केल्यानंतर हा व्हिडिओ बुधवारी म्हणजेच 2 ऑगस्टच्या रात्रीचा असल्याचे समोर आले.
ही घटना मणिपूरच्या कांगपोकपी जिल्ह्यातील आहे ज्याला KPI म्हणूनही ओळखले जाते. कुकी (Kuki) महिला ज्या अधिकाऱ्याला थांबवतात तो लष्कराचा (Indian Army) कर्नल आहे.
मणिपूरमध्ये 3, 4 आणि 5 मे रोजी रक्तरंजित हिंसाचार झाला तेव्हा या लष्करी कर्नलने आपले प्राण धोक्यात घालून शेकडो लोकांना वाचवले होते.
कुकी आणि मेईतेई (Meitei) या दोन्ही समाजातील लोकांना वाचवण्यासाठी या अधिकाऱ्याने स्वत: तीनही दिवस रात्रंदिवस काम केले.
याआधी गुरुवारी म्हणजेच ३ ऑगस्ट रोजी मणिपूरच्या चुराचंदपूर येथील जिल्हा रुग्णालयात कुकी समाजाच्या ३५ मृतदेहांवर सामूहिक दफन करण्याचे नियोजन करण्यात आले होते.
मात्र, गृहमंत्रालयाच्या विनंतीनंतर ते सात दिवसांसाठी पुढे ढकलण्यात आले. ही जागा मेईतेई लोकांची असल्याचे सांगून मृतदेह दफन करण्याच्या योजनेवर मेईतेई समाजाच्या लोकांनीही आक्षेप घेतला होता.
2 ऑगस्टच्या रात्री वरिष्ठ लष्करी अधिकार्‍यांनी कर्नल आणि व्हिडिओमध्ये दिसणार्‍या काही सैनिकांना कांगपोक्की येथून चुराचंदपूर येथे परिस्थिती अधिक बिघडल्यास पाठवण्याचा निर्णय घेतला.
ही बाब कुकी महिलांना कळताच त्यांनी रस्ता अडवून अधिकार्‍याला घेराव घातला आणि त्यांना इथेच थांबण्याची विनवणी सुरू केली. लष्कर आणि आसाम रायफल्स गेले तर त्यांना कोण वाचवणार, अशी भीती महिलांना वाटत होती.
अधिकाऱ्याने महिलांना समजावून सांगितले की त्यांच्या सुरक्षेसाठी सैन्य आणि आसाम रायफल्सचे जवान तिथे असतील.
गेल्या तीन महिन्यांत मणिपूरमधील मेईतेई आणि कुकी समुदायांमध्ये हिंसाचार आणि अविश्वासाच्या स्थितीत, राज्य पोलिस देखील दोन समुदायांमध्ये विभागलेले दिसत आहेत. त्यामुळे लोक त्यांच्या सुरक्षेसाठी आसाम रायफल्स आणि लष्करावर अवलंबून आहेत.
सूत्रांनी दिलेल्या माहितीनुसार, कांगपोकपी जिल्ह्यातील हा व्हिडिओ समोर आला असला तरी इतर अनेक ठिकाणीही हीच परिस्थिती आहे.
डोलताबी-पुखवासेराव भागात मेतई लोकवस्ती मोठ्या प्रमाणावर आहे. लोकांचा विश्वास फक्त आसाम रायफल्स (Assam Rifles) आणि लष्करावर आहे. हिंसाचाराच्या घटना अद्याप सुरू आहेत. त्यामुळे येथील अनेकांना लष्कराशिवाय कोणीही आपली मदत करणार नाही अशी भावना नागरिकांमध्ये निर्माण झाली आहे.
Read Goa news in Marathi and Goa local news on Tourism, Business, Politics, Entertainment, Sports and Goa latest news in Marathi on Dainik Gomantak. Get Goa news live updates on the Dainik Gomantak Mobile app for Android and IOS.