Assam: प्रियकरासोबत रचला कट, पती आणि सासूची हत्या करून फ्रीजमध्ये ठेवले मृतदेहांचे तुकडे, काही दिले फेकून

दिल्लीत श्रद्धा वालकर आणि निक्की यादव यांच्या हत्या करून मृतदेहांचे तुकडे फ्रीजमध्ये ठेवल्याची घटना समोर आली होती. अशीच आणखी एक घटना आता आसाममधूनही समोर आली आहे.

एका महिलेने आपल्या पती आणि सासूची हत्या करून त्यांचे मृतदेह फ्रीजमध्ये लपवून ठेवल्याचा आरोप पोलिसांनी केला. आसाममधील नूनमती भागात ही घटना घडली आहे.

पोलिसांनी एका वृत्तवाहिनीला दिलेल्या माहितीनुसार, आरोपी महिलेची वंदना कलिता असे नाव आहे. पोलिसांच्या प्राथमिक तपासात वंदनाचे विवाहबाह्य संबंध असल्याचे निष्पन्न झाले आहे. यामुळे वंदनाने पती अमरज्योती डे आणि सासू शंकरी डे यांची हत्या केली.

दोघांची हत्या केल्यानंतर तीन दिवसांनी वंदनाने प्रियकराच्या मदतीने मृतदेहाचे तुकडे करून काही तुकडे मेघालयातील चेरापुंजी येथे फेकल्याचे पोलीस तपासात निष्पन्न झाले आहे.

घटनेची माहिती मिळताच वंदना आसाम पोलिसांच्या टीमला चेरापुंजी येथे घेऊन गेली. याठिकाणी तिने तिच्या प्रियकरासोबत तिच्या पती आणि सासूच्या मृतदेहाचे काही तुकडे फेकले होते. तिने दोन्ही मृतदेहांचे काही तुकडे अनेक दिवस फ्रीजमध्ये ठेवले होते. अशी माहिती वंदनाने पोलिस अधिकाऱ्यांना दिली. घटनेची अधिक माहिती अद्याप समोर आलेली नाही. पोलिस अधिक तपास करीत आहेत.

दरम्यान, देशात खासकरून दिल्लीत दोन अतिशय क्रूर पद्धतीने हत्या केल्याच्या घटना समोर आल्या आहेत. श्रद्धा वालकर आणि निक्की यादव अशी ही दोन प्रकरणे आहेत. यात देखील त्यांची हत्या करून मृतदेह फ्रीजमध्ये ठेवले होते. या घटनेतील आरोपी अटक असून, प्रकरण न्यायप्रविष्ट आहे.