VIDEO: "मनीषाशीच लग्न लावा, नाहीतर जीव देईन"; तरुणी चढली मोबाईलच्या टॉवरवर, समलैंगिक प्रेमप्रकरणाचा हायव्होल्टेज ड्रामा

बिहारमधील मुजफ्फरपूर जिल्ह्यात प्रेमसंबंधातून घडलेल्या एका नाट्यमय घटनेने सर्वांचे लक्ष वेधून घेतले. आपल्या मैत्रिणीशी विवाह करण्याची मागणी करत एका तरुणीने शेकडो फूट उंच मोबाईल टॉवरवर चढून आत्महत्येची धमकी दिली. या प्रकारामुळे परिसरात एकच खळबळ उडाली असून पोलिस आणि स्थानिक प्रशासनाला अनेक तास परिस्थिती नियंत्रणात आणण्यासाठी प्रयत्न करावे लागले.

प्रेयसीचे लग्न ठरताच संताप

ही घटना साहेबगंज पोलीस ठाण्याच्या हद्दीतील तेलिया छपरा गावात घडली. माहितीप्रमाणे, बबिता कुमारी नावाच्या तरुणीचे तिची मैत्रीण मनीषा कुमारी हिच्याशी प्रेमसंबंध असल्याचा दावा करण्यात आला आहे. दोघींना एकत्र आयुष्य जगायचे होते; मात्र कुटुंबीयांनी या नात्याला मान्यता दिली नसल्याचे सांगितले जाते.

काही दिवसांपूर्वी मनीषासाठी विवाहाचा प्रस्ताव निश्चित झाल्याची माहिती बबिताला मिळाली. त्यानंतर ती थेट मनीषाच्या घरी जाऊन विवाह थांबवण्याची विनंती करू लागली. मात्र कुटुंबीयांनी तिची मागणी नाकारल्याचे समोर आले. बिहार एक्सप्रेस लाईव्ह या वृत्तवाहिनीचा व्हिडिओ व्हायरल झाला आहे.

टॉवरवर चढून आत्महत्येची धमकी

कुटुंबीयांच्या नकारानंतर भावनिक तणावात असलेल्या बबिताने मोबाईल टॉवरवर चढून आंदोलन सुरू केले. टॉवरच्या उंच भागावर उभे राहून ती आपल्या मागणीवर ठाम असल्याचे सांगत होती. आपल्या इच्छेनुसार विवाह झाला नाही तर टॉवरवरून उडी मारून जीवन संपवण्याची धमकी तिने दिल्याचे प्रत्यक्षदर्शींनी सांगितले.

गावात एकच खळबळ, मोठी गर्दी

तरुणी टॉवरवर चढल्याचे लक्षात येताच काही मिनिटांतच घटनास्थळी शेकडो ग्रामस्थ जमा झाले. अनेकजण तिला खाली उतरण्याची विनंती करत होते. परिस्थिती गंभीर होताच पोलिस, प्रशासन आणि बचाव पथक घटनास्थळी दाखल झाले. त्यांनी तरुणीची समजूत काढण्याचा प्रयत्न सुरू केला.

या घटनेनंतर पोलिसांनी संबंधित सर्व बाजूंची माहिती घेण्यास सुरुवात केली आहे. तरुणीची सुरक्षितता सुनिश्चित करणे आणि तिच्या मानसिक स्थितीचा विचार करून पुढील कार्यवाही करण्यात येत असल्याची माहिती अधिकाऱ्यांनी दिली. या घटनेमुळे सामाजिक स्वीकार, वैयक्तिक नातेसंबंध आणि मानसिक आरोग्य या मुद्द्यांवरही पुन्हा चर्चा सुरू झाली आहे.