'अकबर' आणि 'सीता', नावाच्या वादावरुन विश्व हिंदू परिषदेची हायकोर्टात धाव; जाणून घ्या नेमकं प्रकरण

Siliguri Forest Lions Names Controversy: पती-पत्नीमधील भांडणे, घरगुती हिंसाचार, विनयभंग, मारहाण, भ्रष्टाचार अशी अनेक प्रकरणे हायकोर्टाच्या दारापर्यंत पोहोचलेली तुम्ही पाहिली असतील, पण नावावरुन वाद हायकोर्टात पोहोचल्याचे तुम्ही कधी ऐकले आहे का? नाहीतर आता ऐका, 'अकबर' आणि 'सीता' यांच्या नावावरुन बराच वाद सुरु आहे आणि विरोध करणाऱ्यांनी हायकोर्टात याचिकाही दाखल केली आहे. 16 फेब्रुवारी रोजी न्यायमूर्ती सौगता भट्टाचार्य यांच्या खंडपीठासमोर याचिका दाखल करण्यात आली होती, त्यावर 20 फेब्रुवारी रोजी सुनावणी होणार आहे. ही नावे बदलण्याची मागणी याचिकेत करण्यात आली आहे. हे प्रकरण दोन मुक्या प्राण्यांशी संबंधित आहे.

काय आहे प्रकरण?

दरम्यान, हे प्रकरण पश्चिम बंगाल राज्यातील सिलीगुडी येथील आहे. ज्यांच्या नावावर वाद होत आहे ते सिंह आणि सिंहिणी आहेत. सिंहाचे नाव 'अकबर' आणि सिंहिणीचे नाव 'सीता' आहे. दोघांनाही नुकतेच त्रिपुरातील सिपाहिजाला प्राणी उद्यानातून आणून सिलीगुडीच्या जंगलात सोडण्यात आले, मात्र विश्व हिंदू परिषदेने त्यांच्या नावावर आक्षेप घेतला. हिंदू आणि मुस्लिम नावे असलेले सिंह आणि सिंहीण एकत्र कसे राहू शकतात? असा सवाल उपस्थित करुन विश्व हिंदू परिषद गदारोळ माजवत आहे. विहिंप सदस्यांचे म्हणणे आहे की, 'अकबर'च्या मादीला 'सीता' असे नाव देणे म्हणजे हिंदू धर्माचा अपमान करण्यासारखे आहे. त्यामुळे नाव बदलण्याची मागणी होत आहे.

ममता सरकारला उत्तर द्यावे लागेल

दुसरीकडे, या प्रकरणात राज्याचे वन अधिकारी आणि सफारी पार्क संचालकांना पक्षकार बनवण्यात आले आहे. वन अधिकाऱ्यांचे म्हणणे आहे की, सिंह आणि सिंहिणीला ही नावे सिलीगुडीला आणण्यापूर्वीच देण्यात आली होती. वन्य प्राण्यांच्या नावावरुन देशात पहिल्यांदाच वाद झाला असून तो हायकोर्टात पोहोचला आहे. या प्रकरणाचा तपास पश्चिम बंगालच्या ममता बॅनर्जी यांच्या सरकारपर्यंत पोहोचू शकतो, कारण थेट सरकारला उत्तर द्यावे लागेल. तर विहिंपचे राष्ट्रीय प्रवक्ते विनोद बन्सल यांनी ट्विट करुन हे प्रकरण धक्कादायक असल्याचे म्हटले आहे. त्यांनी लिहिले की, सिंह आणि सिंहिणीची हिंदू मुस्लिम नावे कोणी दिली हे कळले पाहिजे. यामुळे हिंदूंच्या भावना दुखावल्या आहेत.