'नरेंद्र मोदी देव आहेत का?' ममता बॅनर्जींचा हल्लाबोल

Mamata Banerjee Vs Narendra Modi: पश्चिम बंगालच्या मुख्यमंत्री ममता बॅनर्जी यांनी पुन्हा एकदा मोदी सरकारवर निशाणा साधला आहे. 'नरेंद्र मोदी देव आहेत का?' असा सवाल उपस्थित करत ममतांनी हल्लाबोल केला. ममता बॅनर्जी म्हणाल्या की, 'सध्या प्रत्येक वस्तूचे भाव गगनाला भिडले असून त्यावर चर्चाही होत नाही.' केंद्र सरकारवर निशाणा साधताना त्या पुढे म्हणाल्या की, अर्थव्यवस्थेची स्थिती वाईट आहे. भाव वाढत आहेत. बेरोजगारी शिगेला पोहोचली आहे.'

दरम्यान, माध्यमाशी संवाद साधताना ममता बॅनर्जींना (Mamata Banerjee) विचारण्यात आले की, भाजपकडे (BJP) नरेंद्र मोदी आहेत, तेव्हा विरोधकांचा चेहरा कोण? यावर ममता संतापल्या. त्या म्हणाला, 'मोदी देव आहेत का?' ममता बॅनर्जी पुढे म्हणाल्या की, 'नरेंद्र मोदी (Narendra Modi) हे देशाचे पंतप्रधान आहेत आणि त्यांचा आपल्याला आदर आहे. पण ते देव नाहीत'.

ममता पुढे म्हणाल्या की, देशातील उद्योगांची काय अवस्था झालीय तुम्हाला चांगलंच माहिती आहे. एक लाखाहून अधिक उद्योगपती देश सोडून परदेशात स्थलांतरित झाले, ही शरमेची बाब आहे." त्या पुढे म्हणाल्या, "जर माझ्याकडून मोठी चूक झाली असेल तर ती माझी चूक आहे आणि ते माझ्यावर कारवाई करु शकतात. पण जेव्हा तुम्ही पीएमकेअर्सच्या नावावर पैसे घेता तेव्हा हे पैसे कुठून आले हे कोणी विचारु शकत नाही."