Viral Video: "होमवर्क जमणार नाही, आम्हाला मारा पण मुलाचे मार्क कापू नका" अभ्यासाला कंटाळून वडिलांनी जोडले हात

कानपूर: जून महिना सुरू होताच कडक उन्हाळ्यासोबतच मुलांना उन्हाळी सुट्ट्या लागतात. पण, या सुट्ट्या 'हॉलिडे होमवर्क'शिवाय अपूर्ण असतात. शाळेतून हे मुलांना काम मिळतं, पण प्रत्यक्षात ते पालकांनाच करावं लागतं. अनेक पालकांच्या तर पूर्ण सुट्ट्या मुलांचे गृहपाठ पूर्ण करण्यातच जातात. सध्या अशाच एका वडिलांचा व्हिडीओ व्हायरल होतोय.

'अतरंगी' गृहपाठ, पालकांची वाढती डोकेदुखी

सुट्ट्यांमध्ये बाहेर फिरायला जाण्याचा प्लान बनवणं म्हणजे पालकांसाठी एक मोठी डोकेदुखी असते. त्यातही, लहान मुलांचा गृहपाठ इतका अनोखा आणि 'अतरंगी' असतो की, तो पूर्ण करताना पालक अक्षरशः वैतागून जातात. शाळांमधून एकाहून एक सरस प्रोजेक्ट्स दिले जातात, जे बनवताना पालक अक्षरशः डोक्याला हात लावून बसतात.

याच समस्येशी झगडत असलेल्या एका पित्याने सोशल मीडियावर एक व्हिडिओ शेअर केला आहे, जो सध्या प्रचंड व्हायरल होतोय. आपल्या मुलाच्या हॉलिडे होमवर्कला कंटाळलेला हे वडील व्हिडिओमध्ये हात जोडून म्हणतायत की, "जर माझ्या मुलाची मॅडम हा व्हिडिओ बघत असेल, तर मॅडमजी, तुम्ही जे प्रोजेक्ट वर्क दिलं आहे, ते आमच्याकडून बनत नाहीये. कृपया त्याचे नंबर कापू नका."

'सूर्यफूल नाहीतर ग्लोब, आता ३६ पोस्टर फाडले!'

तो पुढे म्हणतो, "मॅडम मार्क्स कापतील म्हणून मुलगा आम्हाला रोज त्रास देतोय. आतापर्यंत ३६ पोस्टर फाडले आहेत. आता आमच्याकडून नाही होत आहे."

लहान मुलांना शाळेत अनेकदा थर्माकोलचे प्रोजेक्ट्स बनवण्यासाठी दिले जातात, जे मुलांना स्वतःला जमत नाहीत आणि ते बनवताना पालकांची अक्षरशः दमछाक होते.

याच त्रासातून वैतागून ते वडील व्हिडिओमध्ये सांगतायत की, "कधी सूर्यफूल बनवायला सांगतात, तर कधी ग्लोब. तुम्ही आम्हाला मारून घ्या, पण आमच्या मुलाचे मार्क्स कापू नका." त्यावेळी त्याचा मुलगा हसताना दिसतो. व्हिडिओच्या शेवटी बाप-मुलगा दोघेही हात जोडून नम्रपणे विनंती करताना दिसतात.