Viral Video: 'जीवन गेला तरी चालेल, पण रील बनलीच पाहिजे', जोडप्याने कालव्यात घेतली उडी; सोशल मीडियावर व्हिडिओ व्हायरल!

Viral Reel Video: आजच्या सोशल मीडियाच्या जमान्यात प्रसिद्ध होण्यासाठी तरुण मंडळी कोणत्याही थराला जायला तयार आहे. हीच प्रसिद्धी मिळवण्यासाठी काही लोक जीवाचा धोकाही पत्करताना दिसतात, ज्यामुळे त्यांच्यावर आणि इतरांवरही संकट येऊ शकते. नुकताच असाच एक व्हिडिओ सोशल मीडियावर जोरदार व्हायरल झाला आहे, ज्यामध्ये एक जोडपे भरवेगात वाहणाऱ्या कालव्यात रील बनवण्यासाठी उडी मारताना दिसत आहे. सुदैवाने त्यांना काहीही झाले नाही, परंतु त्यांच्या या बेजबाबदार कृत्यावर नेटकऱ्यांकडून जोरदार टीका होत आहे.

आधी हा व्हिडिओ पाहा!

सध्या व्हायरल होत असलेल्या व्हिडिओमध्ये एक जोडपे एका कालव्याच्या काठावर उभे असल्याचे दिसते. या कालव्यात पाण्याचा प्रवाह चांगलाच वेगवान आहे. तरीही दोघेही एकमेकांना पकडून पाण्यात उडी घेतात. जणू एखाद्या चित्रपटातील आत्महत्येचा सीन असल्यासारखे हे दोघे पाण्यात पडतात. विशेष म्हणजे, हे सर्व सुरु असताना तिथे अनेक लोक उभे आहेत आणि त्यांना शांतपणे पाहत आहेत. व्हिडिओमध्ये एक व्यक्ती त्यांचा व्हिडिओ शूट करतानाही स्पष्ट दिसत आहे, ज्यावरुन हे कृत्य केवळ रील बनवण्यासाठीच केले गेले, हे स्पष्ट होते. सुदैवाची गोष्ट ही आहे की, या दोघांनाही कोणतीही दुखापत झाली नाही.

सोशल मीडियावरील प्रतिक्रिया

दरम्यान, हा व्हिडिओ एक्स (पूर्वीचे ट्विटर) प्लॅटफॉर्मवर @imnatasha09 नावाच्या अकाऊंटवरुन शेअर करण्यात आला आहे. व्हिडिओसोबत दिलेल्या कॅप्शनमध्ये 'ना लाईफ की फिक्र, न पानी का डर बस रील्स बननी चाहिए सर' असे लिहिले. याचा अर्थ, 'जीवाची काळजी नाही, पाण्याची भीती नाही, फक्त रील बनली पाहिजे'.

ही पोस्ट व्हायरल झाल्यानंतर त्यावर नेटकऱ्यांनी मोठ्या प्रमाणात संतप्त प्रतिक्रिया व्यक्त केल्या आहेत. काही युजर्सनी हे कृत्य अत्यंत धोकादायक आणि मूर्खपणाचे असल्याचे म्हटले. एका युजरने कमेंट केली की, "काय ड्रामा चालू आहे!" तर दुसऱ्या एका युजरने "मृत्यू आला तरी चालेल, पण रील बनवणे सोडायचे नाही" असे उपहासाने म्हटले. आणखी एका युजरने "रीलचे व्यसन अजूनही कमी झालेले नाही" अशी प्रतिक्रिया दिली. या प्रतिक्रिया सोशल मीडियावरील (Social Media) बेजबाबदार वर्तनाबद्दल लोकांमध्ये असलेली नाराजी स्पष्टपणे दर्शवतात.