आजच्या धावपळीच्या जीवनशैलीत ऑनलाइन फूड डिलिव्हरीचा वापर मोठ्या प्रमाणात वाढला आहे. घरबसल्या आवडीचे पदार्थ मागवण्याची सुविधा अनेकांसाठी सोयीची ठरते. मात्र, कधी-कधी ऑर्डरच्या मूळ किमतीपेक्षा वेगवेगळे शुल्क अधिक असल्याचे पाहायला मिळते. अशाच एका कथित ऑनलाइन फूड ऑर्डरचा स्क्रीनशॉट सध्या सोशल मीडियावर चर्चेचा विषय ठरला आहे. अवघ्या 379 रुपयांच्या खाद्यपदार्थांच्या ऑर्डरवर तब्बल 744 रुपये डिलिव्हरी चार्ज आकारल्याचा दावा करण्यात आला आहे. या स्क्रीनशॉटनंतर यूजर्सनी ऑनलाइन फूड डिलिव्हरीच्या अतिरिक्त शुल्कावर प्रश्न उपस्थित केले आहेत.
X या सोशल मीडिया प्लॅटफॉर्मवर एका यूजरने ऑनलाइन फूड डिलिव्हरी ऑर्डरचा स्क्रीनशॉट शेअर केला. त्यामध्ये खाद्यपदार्थांची मूळ किंमत 379 रुपये असल्याचे दिसत आहे. मात्र, अंतिम पेमेंटच्या वेळी विविध शुल्क जोडल्यामुळे बिलाची रक्कम मोठ्या प्रमाणात वाढली.
कथित बिलानुसार, रेस्टॉरंट पॅकेजिंगसाठी 19 रुपये, प्लॅटफॉर्म शुल्क म्हणून 14.90 रुपये आणि GSTच्या स्वरूपात 149.50 रुपये आकारण्यात आल्याचे दिसते. यामध्ये सर्वाधिक धक्का देणारी बाब म्हणजे 744 रुपयांचे डिलिव्हरी शुल्क दाखवण्यात आले आहे.
खाद्यपदार्थांची किंमत काहीशे रुपयांमध्ये असताना विविध शुल्कांमुळे अंतिम बिल 1,306.40 रुपये इतके झाल्याचा दावा या पोस्टमध्ये करण्यात आला आहे. त्यानंतर डिस्काउंट कूपन लागू केल्यावरही ग्राहकाला सुमारे 1,166 रुपये भरावे लागणार असल्याचे स्क्रीनशॉटमध्ये दाखवण्यात आले.
म्हणजेच 379 रुपयांच्या ऑर्डरसाठी ग्राहकाला मूळ खाद्यपदार्थांच्या किमतीच्या तुलनेत तिप्पटपेक्षा जास्त रक्कम मोजावी लागल्याचे दिसत आहे. यामुळे हा स्क्रीनशॉट सोशल मीडियावर मोठ्या प्रमाणात व्हायरल झाला.
इतका मोठा डिलिव्हरी चार्ज पाहून संबंधित यूजरने उपरोधिक पद्धतीने प्रतिक्रिया दिली. एवढे पैसे आकारले जात असतील तर जेवण विमानानेच येणार आहे का, असा सवाल त्याने उपस्थित केला. त्याच्या पोस्टनंतर इतर सोशल मीडिया यूजर्सनीही या प्रकारावर प्रतिक्रिया देण्यास सुरुवात केली.
काही जणांनी अशा शुल्कांवर मर्यादा असावी, असे मत मांडले. तर काहींनी एवढे पैसे देण्यापेक्षा ग्राहकाने स्वतः रेस्टॉरंटमध्ये जाऊन जेवण करणे अधिक योग्य असल्याचे म्हटले. काही यूजर्सनी आपल्या अनुभवांचे उदाहरण देत फूड डिलिव्हरी ऑर्डरमध्ये विविध प्रकारचे शुल्क वाढल्याचे सांगितले.
ऑनलाइन फूड डिलिव्हरी करताना ग्राहकांना केवळ पदार्थांची किंमतच भरावी लागत नाही. पॅकेजिंग, प्लॅटफॉर्म, डिलिव्हरी आणि कर अशा विविध शुल्कांचा अंतिम बिलावर परिणाम होतो. त्यामुळे ऑर्डर कन्फर्म करण्यापूर्वी ग्राहकांनी अंतिम पेमेंट स्क्रीनवर एकूण रक्कम तपासणे महत्त्वाचे ठरते.
विशेषतः कमी किमतीच्या ऑर्डरवर डिलिव्हरी किंवा इतर शुल्क असामान्य पद्धतीने वाढलेले दिसल्यास ग्राहकांनी ऑर्डर करण्यापूर्वी त्याची पडताळणी करणे आवश्यक आहे.
दरम्यान, या व्हायरल स्क्रीनशॉटच्या सत्यतेबाबतही सोशल मीडियावर प्रश्न उपस्थित झाले आहेत. काही यूजर्सना 379 रुपयांच्या ऑर्डरवर 744 रुपये डिलिव्हरी चार्ज आणि जवळपास 150 रुपये GST आकारला जाणे संशयास्पद वाटत आहे.
काहींनी हा प्रकार अॅपमधील तांत्रिक बिघाडामुळे घडला असावा, तर काहींनी स्क्रीनशॉट एडिट केलेला किंवा AIच्या मदतीने तयार केलेला असण्याची शक्यता व्यक्त केली आहे. त्यामुळे संबंधित फूड डिलिव्हरी प्लॅटफॉर्मकडून अधिकृत स्पष्टीकरण मिळाल्याशिवाय या स्क्रीनशॉटमधील शुल्काला निश्चित सत्य मानणे योग्य ठरणार नाही.
ऑनलाइन ऑर्डर करताना ग्राहकांनी पदार्थांची किंमत, डिलिव्हरी शुल्क, प्लॅटफॉर्म फी, पॅकेजिंग चार्ज आणि GST यासह अंतिम बिल नीट तपासावे. एखादा चार्ज असामान्य वाटत असल्यास ऑर्डर करण्यापूर्वी ग्राहक सेवा विभागाशी संपर्क साधणे योग्य ठरेल.
सध्या हा स्क्रीनशॉट खरा आहे की तांत्रिक त्रुटीचा परिणाम आहे, हे स्पष्ट झालेले नाही. मात्र, या घटनेमुळे ऑनलाइन फूड डिलिव्हरीमध्ये आकारल्या जाणाऱ्या अतिरिक्त शुल्काबाबतची चर्चा पुन्हा एकदा सोशल मीडियावर रंगली आहे.
दैनिक गोमंतकचे सदस्य व्हा
शॉपिंगसाठी 'सकाळ प्राईम डील्स'च्या भन्नाट ऑफर्स पाहण्यासाठी क्लिक करा.
Read Goa news in Marathi and Goa local news on Tourism, Business, Politics, Entertainment, Sports and Goa latest news in Marathi on Dainik Gomantak. Get Goa news live updates on the Dainik Gomantak Mobile app for Android and IOS.