हिमाचल विधानसभेच्या गेटवर खलिस्तानी झेंडे, व्हिडिओ व्हायरल

हिमाचलच्या धर्मशाळेत विधानसभेच्या इमारतीबाहेर खलिस्तानी झेंडे (Khalistan flags) दिसल्याने खळबळ उडाली आहे. या झेंड्यांवर खलिस्तान लिहिले होते. ही बाब उघडकीस आल्यानंतर योल पोलिसांनी त्यांना घटनास्थळावरून ताब्यात घेतले. पोलिसांनी सांगितले की, येथील स्थानिक लोकांनी सकाळी विधानसभेच्या मुख्य गेटवर काळे झेंडे दाखवल्याची माहिती दिली. या घटनेचा पोलीस सखोल तपास करत आहेत. (Khalistan flags found Himachal Pradesh Legislative Assembly)

धर्मशाळा तपोवन येथील विधानसभा इमारतीचा एक व्हिडिओही व्हायरल होत आहे. हा व्हिडिओ विधानसभा इमारतीच्या बाहेरील गेटचा आहे जिथे खलिस्तानी झेंडे दिसत आहेत. हा व्हिडिओ 12 सेकंदांचा आहे. हा व्हिडिओ व्हायरल झाल्यानंतर धर्मशाळेत खळबळ उडाली आहे. हे झेंडे कोणी लावले याचा तपास सुरू आहे. दुसरीकडे या प्रकरणाची माहिती मिळताच पोलीस आणि एसडीएम शिल्पी वेक्टाही घटनास्थळी पोहोचले. विधानसभेच्या भिंतींवरही खलिस्तान लिहिण्यात आले आहे. हे झेंडे येथे कोणी लावले हे अद्याप समजू शकलेले नाही. हे झेंडे कोणी आणि का लावले याचा शोध घेण्यासाठी सध्या पोलीस स्थानिक लोकांची चौकशी करत आहेत.

हिमाचलमध्ये सुरक्षा वाढवण्यातआली

हिमाचल प्रदेशच्या शेजारील राज्यांमध्ये दहशतवादाच्या मॉड्यूल्सना अटक करण्याच्या वाढत्या घटना लक्षात घेता हिमाचल सरकारने देखील सतर्कता आणि सुरक्षा वाढवली होती. असे असतानाही अशा घटना घडल्याने सुरक्षा व्यवस्थेवर प्रश्नचिन्ह निर्माण होत आहे. मुख्यमंत्री जयराम ठाकूर म्हणाले होते की, शेजारील राज्यांमध्ये दहशतवादी मॉड्यूल सतत सक्रिय होणे आणि जड शस्त्रांसह पकडले जाणे चिंताजनक आहे. हिमाचलनेही खबरदारीच्या सुरक्षेबाबत पाळत ठेवली आहे. हिमाचलच्या सीमेवर अतिरिक्त पहारा असणार आहे.

ठाकूर म्हणाले होते की, पंजाब, हरियाणा, उत्तर प्रदेश, जम्मू आणि काश्मीरमध्ये अशी गुन्हेगारी प्रतिमा आणि दहशतवादी संघटनांशी संबंधित लोकांना अटक करणे हे सुरक्षा यंत्रणांच्या सतर्कतेचे परिणाम आहे. मात्र शेजारील राज्यांतील घटना पाहता हिमाचल प्रदेशनेही तयारी करणे गरजेचे आहे. या संदर्भात सुरक्षा यंत्रणा, पोलिसांना सज्ज राहण्याच्या सूचना देण्यात आल्या असून अशा गुन्हेगारांवर सतत नजर ठेवण्यास सांगण्यात आले आहे.