15 ते 18 वर्षे वयोगटातील मुलांच्या लसीकरण नोंदणीला सुरुवात, 'या' लिंकवर करा अर्ज

15 ते 18 वर्षे वयोगटातील किशोरवयीन मुलांसाठी कोविड-19 विरोधी लसीकरणासाठी शनिवारपासून Cowin पोर्टलवर (Cowin Portal Registration) नोंदणी सुरू झाली आहे, अशी माहिती केंद्रीय आरोग्य मंत्री मनसुख मांडविया यांनी दिली. मांडविया यांनी ट्विटरवर लोकांना त्यांच्या कुटुंबातील मुलांची लसीकरणासाठी नोंदणी करण्याची विनंती केली आहे.

त्यांनी ट्विट केले की, 'मुले सुरक्षित आहेत, तर देशाचे भविष्य सुरक्षित आहे. नवीन वर्षाच्या निमित्ताने आजपासून (शनिवार) कोविन पोर्टलवर 15 ते 18 वर्षे वयोगटातील बालकांच्या अँटी-कोविड-19 लसीकरणासाठी नोंदणी सुरू होत आहे. लसीकरणासाठी (Vaccination) पात्र बालकांची नोंदणी करावी. 15 ते 18 वर्षे वयोगटातील मुलांचे (children) लसीकरण 3 जानेवारीपासून सुरू होणार आहे.

भारतात शुक्रवारी कोविड-19 (Covid-19) लसीचे 52 लाखांहून अधिक डोस देण्यात आल्याने, देशातील लसीकरण कव्हरेजचा आकडा 145 कोटींच्या पुढे गेला आहे. केंद्रीय आरोग्य मंत्रालयाने शुक्रवारी ही माहिती दिली.