Allu Arjun Arrest : अल्लू अर्जुनला अटक; चेंगराचेंगरीत महिलेचा मृत्यू झाल्याप्रकरणी कारवाई!

Allu Arjun Arrested: एकीकडे 'पुष्पा 2' ने चित्रपटगृहात गदर माजवला असताना दुसरीकडे सुपरस्टार अल्लू अर्जुनच्या चाहत्यांसाठी एक वाईट बातमी आहे. त्याचं झालं असं की, अल्लू अर्जुनला हैदराबादच्या संध्या थिएटरप्रकरणी अटक करण्यात आली आहे.

4 डिसेंबर रोजी, चित्रपटाच्या विशेष स्क्रीनिंग दरम्यान चेंगराचेंगरी झाली, ज्यामध्ये 35 वर्षीय महिलेचा मृत्यू झाला आणि अनेक लोक जखमी झाले होते. या घटनेबाबत पोलिसांनी (Police) अल्लू अर्जुन आणि थिएटर व्यवस्थापनाविरुद्ध गुन्हा दाखल केला होता, त्यानंतर आता थिएटर मालकासह तिघांना अटक करण्यात आली.

संध्या थिएटर प्रकरणी अटक

दरम्यान, ही घटना तेव्हा घडली जेव्हा 'पुष्पा 2' चित्रपटाच्या प्रदर्शनाच्या पूर्वसंध्येला संध्या थिएटरमध्ये विशेष स्क्रीनिंग आयोजित करण्यात आले होते. लोक अॅडव्हान्स तिकीट काढून चित्रपट बघायला आले होते आणि अल्लू अर्जुनही तिथे येणार आहे हे कोणालाच माहीत नव्हते. पण अल्लू अर्जुनच्या टीमने अचानक त्याचा दौरा ठरवला आणि तो थिएटरमध्ये पोहोचताच त्याला पाहण्यासाठी त्याच्या चाहत्यांनी मोठी गर्दी केली, ज्यामुळे चेंगराचेंगरी झाली. चेंगराचेंगरीत एका महिलेला आपला जीव गमवावा लागला, ज्यामुळे अल्लू अर्जुन आणि इतरांवर निष्काळजीपणाचे आरोप झाले.

उच्च न्यायालयात अपील दाखल करण्यात आले

अल्लू अर्जुनने या घटनेबाबत तेलंगणा उच्च न्यायालयात (High Court) अपील दाखल केले होते, ज्यामध्ये त्याने या घटनेत आपली कोणतीही चूक नसल्याचे म्हटले होते. त्यावेळी तो तिथे दुर्भाग्यवश उपस्थित होता. याआधीही एका प्रकरणात शिल्पा रवी रेड्डी यांच्या घरी घडलेल्या एका घटनेत तो हजर होता, मात्र त्या प्रकरणात उच्च न्यायालयाने त्याला दिलासा दिला होता. आता या नव्या प्रकरणात त्याला अटक करण्यात आली आहे.

पुष्पा 2चा जलवा

या घटनेनंतरही 'पुष्पा 2' चित्रपट बॉक्स ऑफिसवर तगडी कमाई करत आहे. या चित्रपटाने पहिल्याच आठवड्यात अनेक विक्रम मोडले असून आतापर्यंत जगभरात 1,000 कोटींहून अधिक कमाई केली आहे.