T20 World Cup: भारतीय संघ गेल्या 11 वर्षांपासून आयसीसी ट्रॉफीची चातकासारखी वाट पाहत होता. तर हा संघ तब्बल 17 वर्षांपासून टी-20 विश्वचषक जिंकण्यापासून वंचित होता. मात्र, शनिवारी (29 जून रोजी) भारतीय संघाने T20 विश्वचषक विजेतेपद पटकावले. रोहित शर्माच्या नेतृत्वाखाली भारतीय संघाने फायनलमध्ये दक्षिण आफ्रिकेचा 7 धावांनी पराभव करत ट्रॉफीवर नाव कोरले. रोहित शर्माच्या नेतृत्वाखाली भारतीय संघाने शानदार कामगिरी केली. खासकरुन फायनलमध्ये विराट कोहली, जसप्रीत बुमराह, हार्दिक पांड्या आणि सूर्यकुमार यादव यांनी संघाला विजय मिळवून देण्यात सिहांचा वाटा उचलला. अशा प्रकारे भारताने तब्बल 17 वर्षांनंतर T20 विश्वचषक विजेतेपद पटकावले. फायनल सामन्यात भारताने दक्षिण आफ्रिकेला 177 धावांचे लक्ष्य दिले होते, ज्यासमोर आफ्रिकेचा संघ 169 धावाच करु शकला.
दरम्यान, सामना जिंकल्यानंतर कर्णधार रोहितला आपल्या भावना आवरता आल्या नाहीत. त्याने मैदानात आनंदोत्सव साजरा केला. रोहित आणि विराट एकमेकांना मिठी मारुन रडले. एवढचं नाहीतर हार्दिक पांड्याच्या गालाचे चुंबन घेत रोहितने त्यालाही मिठी मारली. फायनल सामन्यानंतर हे भावूक क्षण अवघ्या क्रिकेटविश्वाने पाहिले.
टी-20 विश्वचषक सुरु होण्यापूर्वी बीसीसीआयचे सचिव जय शाह यांनी एक वक्तव्य केले होते. ते म्हणाले होते की, 'टी-20 विश्वचषकात आपण रोहित शर्माच्या नेतृत्वाखाली बार्बाडोसमध्ये भारतीय तिरंगा गाढू.' सामना जिंकल्यानंतर भारतीय कर्णधार रोहित शर्माने असेच केले आणि जय शाह यांचा विश्वास त्याने सार्थ करुन दाखवला. यावेळी जय शहा देखील उपस्थित होते.
T20 विश्वचषक जिंकल्यानंतर विराट आणि रोहितने या फॉरमॅटमधून निवृत्ती जाहीर करुन क्रिकेटविश्वाला सुखद धक्का दिला. फायनल सामना जिंकल्यानंतर विराट आणि रोहितने एकमेकांना मिठी मारुन आनंद साजरा केला. यावेळी दोघांच्याही डोळ्यात अश्रू होते. दीर्घकाळ T-20 क्रिकेट खेळल्यानंतर दोघांनीही या फॉरमॅटला अलविदा केला.
महत्त्वाच्या क्षणी 3 विकेट्स घेत सामना भारताच्या बाजूने फिरवणाऱ्या हार्दिक पांड्याला कर्णधार रोहितने जादू की झप्पी दिली. एवढचं नाहीतर रोहितने हार्दिकच्या गालाचे चुंबनही घेतले. या क्षणी हार्दिकच्या डोळ्यात अश्रू होते.
Read Goa news in Marathi and Goa local news on Tourism, Business, Politics, Entertainment, Sports and Goa latest news in Marathi on Dainik Gomantak. Get Goa news live updates on the Dainik Gomantak Mobile app for Android and IOS.