ShivSena Leader Shot Dead: शिवसेना नेत्याची पोलिसांसमोरच गोळी घालून हत्या

ShivSena Leader Shot Dead: पंजाबच्या अमृतसर येथील शिवसेना नेते सुधीर सुरी यांची शुक्रवारी गोळी मारून हत्या करण्यात आली. शहरात दिवसाढवळ्या घडलेल्या या घटनेनंतर खळबळ माजली आहे. घटनास्थळ परिसरातही तणावाचे वातावरण आहे.

गोपाळ मंदिराबाहेरील कचऱ्यात देवतांच्या मुर्ती आढळल्या होत्या. त्या विरोधात सुरी हे मंदिराबाहेर धरणे आंदोलनाला बसले होते. यावेळी गर्दीतील एकाने त्यांच्यावर गोळी झाडली. त्यांना तातडीने रूग्णालयात नेण्यात आले. पण खूप रक्तस्त्राव झाल्याने उपचार सुरू असताना त्यांचा मृत्यू झाला.

पोलिसांनी परिसराची नाकाबंदी करत हल्लेखोर संदीप सिंह याला अटक केली आहे. त्याच्याकडून हल्ल्यात वापरलेली बंदुकही जप्त करण्यात आली आहे. तो अमृतसर येथीलच रहिवाशी आहे. तो व्यवसायाने दुकानदार आहे. सुधीर हे शिवसेना हिंदुस्थानचे प्रमुखही होते.

गेल्या काही काळापासून सुरी यांच्यावर हल्ल्याचा कट आखला जात होता. पोलिसांनी गेल्या महिन्यात काही गँगस्टर्सना अटक केली होती. त्यावेळी चौकशीत त्यांनी हा खुलासा केला होता. जीवाचा धोका असतानाही सुरी यांच्या सुरक्षाव्यवस्थेत चुक राहिली.

प्रत्यक्षदर्शींनी सांगितले की, सुधीर सुरी जेव्हा पोलिस अधिकाऱ्यांसोबत चर्चा करत होते, तेव्हा एका व्यक्तीने त्यांच्यावर दोन ते तीन गोळ्या झाडल्या. हल्लेखोर स्विफ्ट कारमधून आला होता. गोळ्या झाडून तो त्याच कारमधून पळून जात असताना लोकांनी कारवर दगडफेक केली.