EVM हॅक होण्याच्या भीतीत 'समाजवादी'च्या कार्यकर्त्यांनी राभत्रर केले किर्तन

उत्तर प्रदेश विधानसभा निवडणुकांचे (UP Assembly Election Result) निकाल 10 मार्च रोजी घोषित केले जातील. निवडणूक निकालापूर्वी ईव्हीएमच्या सुरक्षिततेबाबत अनेक ठिकाणी चर्चा सुरू झाली आहे. मतदानात फेरफार होण्याची भीती असताना समाजवादी पक्षाचे कार्यकर्ते आणि उमेदवारांनी मतमोजणीपूर्वी इलेक्ट्रॉनिक व्होटिंग मशिन्सची (EVM) देखरेख सुरू केली आहे.

समाजवादी पक्षाच्या नेत्यांचा अनोखा प्रकार कानपूरमध्ये ईव्हीएमच्या निगराणीदरम्यान पाहायला मिळाला. मध्यरात्री, कानपूरमध्ये ईव्हीएम कक्षाच्या बाहेर, सपा नेते (Samajwadi Party) आणि कार्यकर्त्यांनी ढोलक, मंजिरांसह कीर्तन केले. ढोलक आणि मंजिरांच्या तालावर सपा कार्यकर्ते नाचताना आणि गाताना दिसले. यावेळी पक्षाच्या नेत्यांनी 'सपाइयों ने लाइया बड़ी करारी है आज की रात भारी है' हे गाणेही गायले.

मध्यरात्री एकीकडे सपाचे कार्यकर्ते ढोलक आणि मंजिरांच्या तालावर डोलताना दिसले, तर दुसरीकडे ईव्हीएमचे रक्षण करणारे पोलिस आणि निमलष्करी दल पूर्ण तयारीनिशी स्ट्राँग रूमच्या बाहेर तैनात होते. एवढेच नाही तर ईव्हीएमच्या सुरक्षेत तैनात असलेल्या समाजवादी पक्षाच्या कार्यकर्त्यांनी निवडणूक कर्मचाऱ्यांना मंडईच्या गेटमधून बाहेर पडण्यासही रोखले . गेट पास असलेल्या कर्मचाऱ्यांनाच तेथून जाण्याची परवानगी होती. सपाच्या कार्यकर्त्यांनी नगर दंडाधिकारी आणि पोलिसांच्या वाहनांचीही तपासणी केली.

समाजवादी पक्षाचे नेते आणि कार्यकर्त्यांनी ईव्हीएमच्या सुरक्षेबाबत असे काम करण्याची ही पहिलीच वेळ नसली तरी सपाचे उमेदवार दुर्बीण घेऊन आले आहेत. काही दिवसांपूर्वी समाजवादी पक्षाचे उमेदवार आणि हस्तिनापूर विधानसभेचे माजी आमदार योगेश वर्मा आणि त्यांचे समर्थक दुर्बिणीद्वारे ईव्हीएम मशीनवर लक्ष ठेवताना दिसले होते.

जो हस्तिनापूर विधानसभा मतदारसंघातून निवडणूक जिंकतो, त्याचे सरकार उत्तर प्रदेशात बनते. त्यामुळे ईव्हीएम मशीनवर लक्ष ठेवण्याची जबाबदारी आमच्यावर आहे. भाजपचे लोक काहीही करू शकतात, त्यामुळे आम्ही ईव्हीएम मशीनवर बारीक लक्ष ठेवून आहोत, असे योगेश वर्मा म्हणाले होते.