सप्टेंबर महिन्याची सुरुवात होताच सर्वसामान्यांच्या दैनंदिन जीवनाशी संबंधित अनेक नियम आणि दरांमध्ये बदल झाले आहेत. 1 सप्टेंबर 2026 पासून लागू झालेल्या या बदलांचा थेट परिणाम घरगुती बजेट, वाहन खरेदी, कर भरणा, मालमत्ता कर आणि प्रवासाच्या प्रक्रियेवर होऊ शकतो. त्यामुळे तुम्ही या महिन्यात कार खरेदी करण्याचा विचार करत असाल, आयटीआर भरायचा असेल किंवा परदेश प्रवास करणार असाल, तर हे बदल जाणून घेणे महत्त्वाचे आहे.
महिन्याच्या पहिल्याच दिवशी व्यावसायिक गॅस वापरणाऱ्यांना झटका बसला आहे. 19 किलोच्या कमर्शियल LPG सिलेंडरच्या किमतीत 9.50 रुपयांची वाढ करण्यात आली आहे. मात्र घरगुती स्वयंपाकासाठी वापरल्या जाणाऱ्या 14.2 किलोच्या सिलेंडरच्या दरात कोणताही बदल झालेला नाही. त्यामुळे घरगुती ग्राहकांना तूर्तास दिलासा मिळाला आहे.
या महिन्यात नवीन कार घेण्याचा विचार करणाऱ्या ग्राहकांना अतिरिक्त बजेटची तयारी करावी लागेल. टाटा मोटर्स आणि ह्युंदाईने 1 सप्टेंबरपासून त्यांच्या काही वाहनांच्या किमती वाढवल्या आहेत. टाटा मोटर्सच्या विविध मॉडेल्स आणि SUVच्या किमतीत 25 हजार रुपयांपर्यंत वाढ झाली आहे. त्यामुळे वाहन खरेदीपूर्वी सुधारित किंमत तपासणे आवश्यक ठरणार आहे.
मुंबईतील खुल्या किंवा तबेल्यातून थेट विकल्या जाणाऱ्या दुधाच्या किमतीत वाढ झाली आहे. जनावरांच्या चाऱ्याचा खर्च आणि देखभालीचा वाढलेला खर्च यामुळे काही ठिकाणी दुधाचे दर प्रति लिटर 9 रुपयांपर्यंत वाढवण्यात आले आहेत. मात्र पॅकेटबंद दुधाच्या किमतीत सध्या कोणताही बदल करण्यात आलेला नाही.
नॉन-ऑडिट व्यवसाय आणि काही प्रोफेशनल्ससाठी आयकर विवरणपत्र भरण्याची अंतिम तारीख 31 ऑगस्ट होती. त्यामुळे 1 सप्टेंबरपासून रिटर्न दाखल करणाऱ्यांना विलंब शुल्काचा सामना करावा लागू शकतो. उत्पन्नाच्या परिस्थितीनुसार लेट फी 1,000 ते 5,000 रुपयांपर्यंत लागू होऊ शकते. विलंबित रिटर्न भरण्याची अंतिम मुदत 31 डिसेंबर 2026 पर्यंत असल्याचे नमूद करण्यात आले आहे.
आंतरराष्ट्रीय प्रवाशांसाठी एक महत्त्वाचा बदल करण्यात आला आहे. विमानतळावरील इमिग्रेशन प्रक्रियेदरम्यान बोर्डिंग पासवर प्रत्यक्ष शिक्का मारून घेण्याची आवश्यकता राहणार नाही. प्रवासी मोबाईलवर इलेक्ट्रॉनिक बोर्डिंग पास सादर करून प्रक्रिया पूर्ण करू शकतील. त्यामुळे कागदपत्रांच्या वापरात घट होऊन प्रवासाची प्रक्रिया अधिक सोपी होण्याची अपेक्षा आहे.
NCRमधील फरीदाबादच्या नागरिकांसाठी मालमत्ता करासंदर्भात महत्त्वाचा बदल करण्यात आला आहे. आता प्रॉपर्टी टॅक्स निश्चित करताना संबंधित भागातील कलेक्टर रेटचा आधार घेतला जाणार आहे. त्यामुळे ज्या परिसरातील कलेक्टर रेट अधिक आहे, तेथे मालमत्ता करही तुलनेने जास्त लागू शकतो. यासोबतच सुमारे 14 वर्षांनंतर पाणी आणि सीवरच्या दरांमध्येही बदल करण्यात आला असून काही दरांमध्ये तब्बल 200 टक्क्यांपर्यंत वाढ होण्याची शक्यता आहे. त्यामुळे फरीदाबादमधील रहिवाशांच्या मासिक खर्चावर अतिरिक्त भार पडू शकतो.
दर महिन्याच्या पहिल्या दिवशीप्रमाणे पेट्रोल आणि डिझेलचे नवीन दर जाहीर करण्यात आले आहेत. मात्र सध्या पेट्रोल आणि डिझेलच्या किमतीत कोणतीही मोठी वाढ किंवा कपात झालेली नाही. आंतरराष्ट्रीय बाजारातील चढ-उतार असूनही तेल कंपन्यांनी इंधनाचे दर मोठ्या प्रमाणात स्थिर ठेवले आहेत.
अशा प्रकारे सप्टेंबरच्या सुरुवातीपासून LPG, वाहनांच्या किमती, दूध, आयकर, विमानतळावरील इमिग्रेशन आणि स्थानिक करांशी संबंधित बदल नागरिकांच्या दैनंदिन आर्थिक नियोजनावर परिणाम करू शकतात. त्यामुळे महिन्याचे बजेट तयार करताना या बदलांचा विचार करणे फायदेशीर ठरेल.
दैनिक गोमंतकचे सदस्य व्हा
शॉपिंगसाठी 'सकाळ प्राईम डील्स'च्या भन्नाट ऑफर्स पाहण्यासाठी क्लिक करा.
Read Goa news in Marathi and Goa local news on Tourism, Business, Politics, Entertainment, Sports and Goa latest news in Marathi on Dainik Gomantak. Get Goa news live updates on the Dainik Gomantak Mobile app for Android and IOS.