Rohit Sharma Angry: 'ऐ सोड त्याला...' फॅनसाठी मुंबईच्या राजाचा 'हिटमॅन' अवतार! सुरक्षा रक्षकावर भडकला Watch Video

मुंबई : माजी भारतीय कर्णधार रोहित शर्मा सात महिन्यांच्या विश्रांतीनंतर पुन्हा मैदानावर परतण्यासाठी सज्ज झाला आहे. तो ऑस्ट्रेलियाविरुद्धच्या आगामी तीन सामन्यांच्या एकदिवसीय मालिकेत भारतीय संघाकडून खेळताना दिसणार आहे. ही मालिका १९ ऑक्टोबरपासून सुरू होत असून, त्यासाठी रोहित जोरदार सराव करत आहे.

शुक्रवारी (१० ऑक्टोबर) रोहितने मुंबईतील ऐतिहासिक शिवाजी पार्क मैदानावर सराव सत्र गाजवले. सरावादरम्यानचा एक व्हिडिओ सध्या सोशल मीडियावर व्हायरल होत आहे. या व्हिडिओमध्ये रोहित शर्मा एका सुरक्षा रक्षकावर रागावताना दिसतो.

कारण, सराव सत्रानंतर त्याला भेटण्यासाठी एक चिमुकला चाहता दोरी ओलांडून आत आला होता. त्या चाहत्याला सुरक्षा कर्मचाऱ्याने थांबवले, पण हे पाहताच रोहितने तत्काळ हस्तक्षेप केला आणि रागाने म्हटले, “अरे, मुलाला काही करू नका!” असे म्हणत त्याने त्या चाहत्याशी नम्रतेने संवाद साधला.

यानंतर रोहितने नेट्समध्ये फलंदाजी करत काही अप्रतिम कव्हर ड्राइव्ह आणि स्वीप शॉट्स खेळले. त्याच्या प्रत्येक फटक्यानंतर मैदान “हिटमॅन! हिटमॅन!” च्या जयघोषाने दुमदुमून गेले. सरावादरम्यान भारताचे माजी सहाय्यक प्रशिक्षक अभिषेक नायर हे त्याला मार्गदर्शन करत होते, तर मुंबईचा तरुण खेळाडू अंगकृष्ण रघुवंशी देखील सरावात सहभागी झाला होता. रोहितची पत्नी रितिका सजदेह देखील जवळपास दोन तास मैदानावर उपस्थित राहून त्याच्या सरावावर लक्ष ठेवून होती.

अलीकडेच रोहितला एकदिवसीय कर्णधारपदावरून मुक्त करण्यात आले आहे. मात्र, याचा त्याच्या तयारीवर कोणताही परिणाम झालेला नाही. तो आता वरिष्ठ फलंदाज म्हणून संघासाठी योगदान देण्यावर लक्ष केंद्रित करत आहे. तंदुरुस्ती राखण्यासाठी त्याने लक्षणीय वजन कमी केले असून, मैदानावर त्याचा फिटनेस आणि ऊर्जा विशेष जाणवत आहे.

सध्या त्याचे लक्ष आगामी ऑस्ट्रेलिया मालिकेत जोरदार पुनरागमन करण्यावर आहे. क्रिकेट तज्ज्ञांच्या मते, रोहित आणि विराट कोहली या दोघांकडूनही या मालिकेत दमदार कामगिरीची अपेक्षा आहे. दोघेही या वर्षाच्या अखेरीस स्थानिक क्रिकेटमध्ये परत येणार असून, २०२७ च्या एकदिवसीय विश्वचषकाच्या तयारीचा तो भाग मानला जात आहे.