PM Modi Condemned The Death Of Civilians Amid Israel-Hamas War: इस्रायल-हमास युद्धादरम्यान पंतप्रधान नरेंद्र मोदी यांनी मोठे वक्तव्य केले आहे. या युद्धात नागरिकांच्या हत्येचा त्यांनी निषेध केला आहे.
शुक्रवारी व्हॉईस ऑफ ग्लोबल साउथ समिटच्या व्हर्चुअल कार्यक्रमाच्या उद्घाटनपर भाषणात पंतप्रधान मोदी म्हणाले की, इस्रायल आणि हमास (Hamas) यांच्यात सुरु असलेल्या युद्धात नागरिकांच्या मृत्यूचा भारत निषेध करतो.
दक्षिण-पश्चिम आशियामध्ये नवीन आव्हाने उभी राहत असल्याचेही ते म्हणाले. 7 ऑक्टोबर रोजी इस्रायलवर झालेल्या दहशतवादी हल्ल्याचा भारताने निषेधही केला होता. संपूर्ण वादात आम्ही संवाद आणि मुत्सद्देगिरीवर भर दिला आहे, असेही पंतप्रधान मोदी म्हणाले.
तसेच, पीएम मोदी म्हणाले की, पॅलेस्टाईनचे पंतप्रधान महमूद अब्बास यांच्याशी बोलल्यानंतर भारताने गाझा पट्टीतील पीडितांसाठी मदत सामग्री देखील पाठवली आहे.
दरम्यान, ही दुसरी व्हॉईस ऑफ ग्लोबल साउथ समिट आहे, ज्याचे आयोजन भारताने केले आहे. यापूर्वी, जानेवारीमध्ये व्हॉईस ऑफ ग्लोबल साउथ समिट पहिल्यांदाच आयोजित करण्यात आली होती. भारतही त्याचे यजमान होता. आता भारत (India) दुसऱ्यांदा यजमान आहे.
उद्घाटन सत्रात पंतप्रधान मोदी म्हणाले की, हा असा काळ आहे जेव्हा दक्षिण आशियातील शक्तींनी एकत्र येऊन प्रगतीच्या दिशेने वाटचाल केली पाहिजे. नवीन तंत्रज्ञानामुळे ग्लोबल नॉर्थ आणि ग्लोबल साउथमधील अंतर वाढू नये असे आमचे मत आहे, असेही पीएम मोदी म्हणाले.
आर्टिफिशियल इंटेलिजन्सच्या युगात नवीन तंत्रज्ञानाचा वापर जबाबदारीने करायला हवा. हे उद्दिष्ट पूर्ण करण्यासाठी भारत पुढील महिन्यात आर्टिफिशियल ग्लोबल पार्टनरशिप समिटचेही आयोजन करणार असल्याचे त्यांनी यावेळी सांगितले.
भारताच्या परराष्ट्र व्यवहार मंत्रालयाचे प्रवक्ते अरिंदम बागची म्हणाले की, ही दुसरी व्हॉईस ऑफ ग्लोबल साउथ समिट आहे, या उद्घाटन सत्राचे अध्यक्ष पंतप्रधान मोदी आहेत. ते म्हणाले की, ग्लोबल साउथच्या देशांसोबत G20 आयोजित करताना मिळालेल्या यशावर लक्ष केंद्रित करण्याचा प्रयत्न केला जाईल.
या कार्यक्रमात प्रामुख्याने दहा सत्रे होणार असल्याचे त्यांनी सांगितले. उद्घाटन सत्राव्यतिरिक्त, पंतप्रधान मोदी समारोपाच्या सत्राचे अध्यक्षपद भूषवतील.
Read Goa news in Marathi and Goa local news on Tourism, Business, Politics, Entertainment, Sports and Goa latest news in Marathi on Dainik Gomantak. Get Goa news live updates on the Dainik Gomantak Mobile app for Android and IOS.