विमानात प्रवाशांना घेता येणार भारतीय संगीताचा आनंद!

भारतातील विमानतळ आणि फ्लाइट्समध्ये लवकरच भारतीय संगीत ऐकू येईल. नागरी विमान वाहतूक मंत्री ज्योतिरादित्य सिंधिया (Jyotiraditya Scindia) यांनी विमान कंपन्यांना त्यांच्या फ्लाइटमध्ये (Flights) तसेच देशातील विमानतळांवर भारतीय संगीत वाजवण्याचा सल्ला दिला आहे. इंडियन काउंसिल फॉर कल्चरल रिलेशन्सने (ICCR) नागरी विमान वाहतूक मंत्र्यांना या संदर्भात निवेदन सादर केले होते, त्यानंतर त्यांनी हा सल्ला दिला आहे.

विमान वाहतूक मंत्रालयाच्या संयुक्त सचिव उषा पाधी यांच्या वतीने DGCA प्रमुख अरुण कुमार यांनी एक पत्र लिहिले आहे. पत्रात म्हटले आहे की, “जगभरातील बहुतेक एअरलाइन्स ज्या देशाची एअरलाइन (airline) आहे त्या देशातील सर्वोत्तम संगीत वाजवतात. उदाहरणार्थ, अमेरिकन एअरलाइनमध्ये जॅझ किंवा ऑस्ट्रियन एअरलाइनमध्ये मोझार्ट आणि मध्य पूर्व एअरलाइनमध्ये अरब संगीत, परंतु भारतीय एअरलाइन्स क्वचितच उड्डाणात भारतीय संगीत वाजवतात, तर आपल्याकडे समृद्ध संगीत वारसा आणि संस्कृती आहे. ज्याचा खरोखरच प्रत्येक भारतीयाला अभिमान वाटण्याचे कारण आहे.

पाधी यांच्या पत्रात म्हटले आहे की, "केंद्रीय विमान वाहतूक मंत्रालयाला ICCR कडून भारतात आणि विमानतळावर चालणाऱ्या विमानांमध्ये भारतीय संगीत वाजवण्याची विनंती प्राप्त झाली आहे." त्यामुळे नियामक आवश्यकतांचे पालन करण्यासाठी कृपया विचार करावा ही विनंती.

ICCR ने 23 डिसेंबर रोजी ज्योतिरादित्य सिंधिया यांना निवेदन सादर केले

यापूर्वी 23 डिसेंबर रोजी, ICCR ने भारताचे नागरी उड्डयन मंत्री ज्योतिरादित्य सिंधिया यांना एक निवेदन सादर केले होते, ज्यामध्ये भारतीय संगीताचा प्रचार करण्यासाठी प्रत्येक फ्लाइटला भारतीय संगीत वाजवणे बंधनकारक करण्यास सांगितले होते. ICCR ने विमान वाहतूक मंत्री ज्योतिरादित्य सिंधिया यांना आपल्या कार्यक्रमात बोलावून त्यांना निवेदन सादर केले होते. यादरम्यान असे म्हटले होते की जर इंडियन एअरलाइन्समध्ये असे झाले तर भारतीय संगीताला खूप शक्ती मिळेल. सिंधिया म्हणाले होते, 'मी ग्वाल्हेरच्या संगीतनगरीतून आलो आहे, जे तानसेनचे शहर आहे आणि संगीताचे जुने घर आहे. भारतीय प्राचीन संगीताला अनेक वर्षांचा इतिहास आहे आणि लोकांना प्राचीन संगीतातही खूप रस आहे.