'एका रात्रीत कोणी भ्रष्टाचारी होत नाही'; Goa काँग्रेस फुटीवर आसामचे CM Himanta Biswa यांची प्रतिक्रिया

गोव्यात आठ काँग्रेस आमदारांनी पक्षाचा हात सोडून भाजपचे कमळ हाती घेतले. काँग्रेस आमदारांच्या प्रवेशामुळे गोव्यातील राजकीय वातावरण ढवळून निघाले आहे. आमदारांनी केलेल्या पक्षांतरासाठी काँग्रेसने भाजपवर गंभीर आरोप केले आहेत. प्रत्येक आमदाराला पक्षांतरासाठी 30 ते 40 कोटी रूपये दिल्याचा आरोप दिनेश गुंडूराव यांनी केला. काँग्रेस आमदारांच्या बंडावर आसामचे मुख्यमंत्री हिमंत बिस्वा सरमा यांनी देखील प्रतिक्रिया दिली आहे.

आसामचे मुख्यमंत्री हिमंत बिस्वा सरमा यांनी एका वृत्तवाहिनीला मुलाखत दिली. गोव्यातील पक्षांतरामध्ये हिमंत यांचा हात असल्याचा आरोप काँग्रेसने केला आहे. याबाबत मुख्यमंत्री हिमंत बिस्वा सरमा यांना प्रश्न विचारला. या प्रश्नाला उत्तर देताना मुख्यमंत्री म्हणाले, "मला माहित नाही काँग्रेस माझ्यावर का आरोप करत आहे. पण, मी कधीच गोव्याला गेलेलो नाही. आमदारांवर पैसे घेतल्याचा आरोप देखील का केला जात आहे कळत नाही. एका रात्रीत कोणी भ्रष्टाचारी होत नाही. अशा लोकांना काँग्रेसमध्ये का ठेवले होते." असा सवाल देखील हिमंत बिस्वा सरमा यांनी उपस्थित केला.

काँग्रेसचे आमदार त्यांना सोडून जात आहेत आणि पक्ष माझ्यावर आरोप का करत आहे हे कळत नाही. त्यांनी केलेले आरोप मी पूर्णपणे फेटाळतो असे हिमंत सरमा म्हणाले. काँग्रेसच्या भारत जोडो यात्रेवर देखील सरमा यांनी टिका करत, भारत कधीच तुटला नव्हता, काँग्रेस केरळ आणि तमिळनाडूतील जनतेचा अपमान करत असल्याचा आरोप सरमा यांनी केला.