Multiple Bank Accounts: तुमचीही आहेत एकापेक्षा जास्त बँक खाती? मग हे वाचा, अन्यथा नुकसान अटळ

Disadvantage Of Multiple Bank Accounts: आजच्या डिजिटल युगात बँकिंग आपल्या दैनंदिन जीवनाचा अविभाज्य भाग बनला आहे. UPI, नेट बँकिंग आणि इतर डिजिटल माध्यमांद्वारे आर्थिक व्यवहार झपाट्याने वाढले आहेत. या सगळ्यासाठी आपल्याला बँक खातं असणं अत्यावश्यक आहे. मात्र अनेकजण एकापेक्षा जास्त म्हणजेच दोन ते तीन बँक खाती ठेवतात. ही सवय फायदेशीर वाटली तरी त्याचे काही गंभीर तोटेही आहेत.

विशेषतः जेव्हा आपण प्रत्येक बँक खात्याचं योग्यरीत्या व्यवस्थापन करत नाही, तेव्हा आर्थिक नुकसान होण्याची शक्यता अधिक वाढते. चला तर मग पाहूया एकापेक्षा अधिक बँक खाती असण्याचे चार मुख्य तोटे जाणून घेऊया.

किमान शिल्लक न ठेवल्यास आर्थिक नुकसान

प्रत्येक बँकेचा एक नियम असतो, खाते चालू ठेवण्यासाठी एका ठराविक रकमेपर्यंत किमान शिल्लक ठेवणं गरजेचं असतं. जर तुमच्याकडे तीन बँक खाती असतील, तर प्रत्येक खात्यात ही किमान रक्कम अडकून पडते. परिणामी तुमची एकूण गुंतवणूक न वापरता बँकेतच अडकते. त्यामुळे एकच मुख्य खाते ठेवा आणि उर्वरित खात्यांमध्ये व्यवहार होत नसतील तर त्यांना बंद करा.

बँका सेवा कर आकारतात

अनेक बँका खातं न वापरल्यास किंवा किमान रक्कम न ठेवल्यास देखभाल शुल्क आकारतात. शिवाय, डेबिट कार्ड, चेक बुक, एसएमएस सेवा यासाठीही वार्षिक शुल्क आकारलं जातं. अनेक खाती असल्यास या सर्व शुल्कांचा एकत्रित बोजा तुमच्यावर पडतो.

क्रेडिट स्कोअरवर परिणाम

जर तुमचं एखादं बँक खाते निष्क्रिय असेल आणि त्यात किमान शिल्लक नसेल, तर त्याचा परिणाम तुमच्या क्रेडिट स्कोअरवर होऊ शकतो. क्रेडिट स्कोअर हा कर्ज मिळवण्यासाठी अत्यंत महत्त्वाचा मानला जातो.जर बँकेकडून तुम्हाला ‘Defaulter’ मानलं गेलं, तर भविष्यात कर्ज किंवा क्रेडिट कार्ड मिळण्यात अडचणी येऊ शकतात.

कर भरण्यात अडचण

एकाधिक बँक खाती असल्यास आयकर विवरण सादर करताना सर्व खात्यांची माहिती योग्य प्रकारे सादर करणं आवश्यक असतं. यासाठी प्रत्येक खात्याचं स्टेटमेंट, फॉर्म 26AS तपासणं आणि त्यातील तपशील जुळवणं ही मोठी डोकेदुखी होऊ शकते. जर चुकीची माहिती दिली गेली किंवा काही खाती लपवली गेली, तर आयकर विभागाच्या रडारवर यायची शक्यता वाढते.

जेव्हा तुम्ही नोकरी बदलता, तेव्हा तुमचं पूर्वीचं पगार खातं काही महिन्यांनंतर आपोआप बचत खात्यात रूपांतरित होतं. पगार खात्याला किमान शिल्लक आवश्यक नसते, पण बचत खात्यासाठी असते. जर तुम्ही ही रक्कम न भरली तर बँक दंड आकारते.