मिर्झापूरमधील ड्रमंडगंज घाटात बुधवारी रात्री साडेआठच्या सुमारास काळाने भीषण झडप घातली. एका भरधाव ट्रकचे ब्रेक निकामी झाल्यामुळे घडलेल्या या अपघातात ११ जणांचा दुर्दैवी अंत झाला. या अपघाताचे स्वरूप इतके भयानक होते की, धडक लागताच बोलेरो गाडीने पेट घेतला आणि त्यातील नऊ प्रवासी जिवंत जळाले.
मिर्झापूरमधील ड्रमंडगंज घाटातील 'बड़का घुमान' वळणावर हा अपघात घडला. मध्यप्रदेशातून हरभरा घेऊन येणाऱ्या एका ट्रकचे ब्रेक अचानक निकामी झाले. उतारावर असल्याने ट्रक अनियंत्रित झाला आणि त्याने समोरून जाणाऱ्या ऑल्टो कारला जोरदार धडक दिली. ही धडक इतकी तीव्र होती की कार दोन्ही ट्रकच्या मध्ये चिरडली गेली. त्यानंतर ट्रकने एका बोलेरोलाही उडवले, ज्यामुळे बोलेरोमध्ये भीषण आग लागली.
घटनेची माहिती मिळताच स्थानिक पोलीस आणि अग्निशमन दलाच्या गाड्या घटनास्थळी दाखल झाल्या. मात्र, अग्निशमन दलाने आगीवर नियंत्रण मिळवेपर्यंत बोलेरोमधील चालकासह सर्व नऊ प्रवाशांचा जिवंत जळून मृत्यू झाला होता. हे सर्व प्रवासी जिगना परिसरातील नरैना गावातील रहिवासी होते. एकाच गावातील इतक्या लोकांचा मृत्यू झाल्याने संपूर्ण गावावर शोककळा पसरली आहे. मृतांमध्ये लहान मुले आणि महिलांचाही समावेश असून त्यांची ओळख पटवण्यात आली आहे.
या भीषण दुर्घटनेत ऑल्टो कारचा चालक जयप्रकाश (२६, रा. सोनभद्र) आणि ट्रकचा खलासी यांचाही ढिगाऱ्याखाली दबून मृत्यू झाला. पोलीस अधीक्षक अपर्णा रजत कौशिक यांनी दिलेल्या माहितीनुसार, ट्रकचा ब्रेक फेल होणे हेच या अपघाताचे मुख्य कारण आहे. बोलेरोमधील मृतांमध्ये बीना सिंह, वंदना, पंकज, पीयूष, सोनम, प्रियंका, शिवा, कार्तिकेय आणि चालक विष्णू सिंह यांचा समावेश आहे. अपघातामुळे वाराणसी-रीवा महामार्गावरील वाहतूक बराच काळ विस्कळीत झाली होती.
ड्रमंडगंज घाटातील धोकादायक वळणे आणि जड वाहनांचे बिघडणारे तांत्रिक आरोग्य यामुळे या परिसरात वारंवार अपघात होत असल्याचे स्थानिकांचे म्हणणे आहे. या अपघाताने प्रशासकीय यंत्रणेच्या सतर्कतेवर आणि घाटातील वाहतूक नियमांवर पुन्हा एकदा प्रश्नचिन्ह उपस्थित केले आहे. एका तांत्रिक बिघाडाने अनेक हसतीखेळती कुटुंबे उद्ध्वस्त केली असून, मिर्झापूर जिल्ह्यात या घटनेने हळहळ व्यक्त केली जात आहे.
दैनिक गोमंतकचे सदस्य व्हा
शॉपिंगसाठी 'सकाळ प्राईम डील्स'च्या भन्नाट ऑफर्स पाहण्यासाठी क्लिक करा.
Read Goa news in Marathi and Goa local news on Tourism, Business, Politics, Entertainment, Sports and Goa latest news in Marathi on Dainik Gomantak. Get Goa news live updates on the Dainik Gomantak Mobile app for Android and IOS.