परदेशातून मतदानासाठी गावी आला; शौचास गेला अन् गुरांचा तस्कर समजून BSF ने झाडल्या गोळ्या

West Bengal: शौचालयासाठी बाहेर पडलेल्या एका व्यक्तीचा गोळी लागल्याने मृत्यू झाला आहे. बीएसएफने केलेल्या गोळीबारात तरुणाचा जीव गेला. पश्चिम बंगालच्या कूचबिहारमधील मसीबाडी येथील ही घटना असून, हा तरुण रात्री घराशेजारी शौचास गेला होता. याप्रकरणी बीएसएफवर तरुणाला गोळ्या घालून ठार केल्याचा आरोप केला जात आहे.

आज तकने दिलेल्या वृत्तानुसार, घटनेबाबत ग्रामस्थांमध्ये बीएसएफविरोधात प्रचंड संताप उसळला असून, कुचलीबारी पोलिस ठाण्याच्या पोलिसांनी मृतदेह ताब्यात घेऊन शवविच्छेदनासाठी पाठवला आहे.

गौतम बर्मन असे मृत तरुणाचे नाव असून तो फुलकादावरी गावचा रहिवासी असल्याचे पोलिसांनी सांगितले. हा तरुण परदेशात मोलमजुरी करून आठवडाभरापूर्वी पंचायत निवडणुकीत मतदान करण्यासाठी गावी परतला होता.

मृताच्या नातेवाईकांनी पोलिसांत तक्रार दाखल केली आहे. मृतदेह पोस्टमॉर्टमसाठी पाठवण्यात आला आहे. तरुणाच्या डोक्यात गोळी लागल्याचे सांगण्यात येत आहे.

बीएसएफने गोळ्या झाडून मृतदेह काटेरी तारांजवळील भागात फेकून दिला. असे मृताचा भाऊ श्यामल रॉय यांनी म्हटले आहे.

तर, गुरांचा तस्कर असल्याच्या संशयावरून तरुणाची गोळ्या झाडून हत्या करण्यात आल्याचा बीएसएफचा दावा आहे. गुरांची तस्करी करण्यासाठी तरुणांना रोखले असता बीएसएफवर हल्ला केला. असे बीएसएफने म्हटले आहे.