Earthquake in Ladakh: लडाखमध्ये भूकंपाचे जोरदार धक्के, रिश्टर स्केलवर 4.8 तीव्रता 

लडाखमध्ये आज पहाटे 4.19 च्या सुमारास भूकंपाचे जोरदार धक्के जाणवले. सेंटर फॉर सिस्मॉलॉजीनुसार, रिश्टर स्केलवर भूकंपाची तीव्रता 4.8 इतकी होती. मिळालेल्या माहितीनुसार, भूकंपाचा केंद्रबिंदू अल्ची (लेह) पासून 189 किमी उत्तरेस होता आणि त्याची खोली जमिनीपासून 10 किमी खाली होती. सध्या या भूकंपामुळे जीवित वा वित्तहानी झाल्याची कोणतीही माहिती नाही.

याआधी 7 सप्टेंबर रोजी दुपारी 12.50 च्या सुमारास मिझोराममधील चंफई येथे भूकंपाचे जोरदार धक्के जाणवले. सेंटर फॉर सिस्मॉलॉजीनुसार, भूकंपाची तीव्रता रिश्टर स्केलवर 4.4 इतकी होती. मिळालेल्या माहितीनुसार, भूकंपाचा केंद्रबिंदू चंफईच्या पूर्वेला पन्नास किलोमीटरवर होता आणि त्याची खोली जमिनीपासून 13 किलोमीटर खाली होती. 

मिझोरामपूर्वी 25-26 ऑगस्टच्या रात्री जम्मू-काश्मीरपासून महाराष्ट्रात (Maharashtra) भूकंपाचे धक्के जाणवले. त्याचवेळी अफगाणिस्तानात पृथ्वीचा थरकाप झाल्याने लोक भयभीत झाले होते. त्यानंतर रात्री 2.21 मिनिटांनी कोल्हापुरात भूकंपाचे धक्के जाणवले. ज्याची तीव्रता 3.9 मोजली गेली. यानंतर जम्मू-काश्मीरमध्येही भूकंपाचे धक्के जाणवले. या भूकंपाची तीव्रता रिश्टर स्केलवर 3.4 एवढी होती.