Supreme Court: न्यायमूर्ती लळित यांनी CJI म्हणून सांगितल्या या प्राथमिकता

Justice Lalit: न्यायमूर्ती लळित आता एनव्ही रमना यांच्यानंतर सरन्यायाधीश म्हणून पदभार स्वीकारतील. न्यायमूर्ती लळित शनिवारी पदभार स्वीकारणार आहेत. यातच शुक्रवारी त्यांनी देशाच्या सर्वोच्च न्यायालयाचे मुख्य न्यायाधीश म्हणून आपल्या प्राधान्यांबद्दल सांगितले. यावेळी त्यांनी आपल्या 73 दिवसांच्या कार्यकाळात कोणत्या गोष्टींवर लक्ष देणार असल्याचे सांगितले.

दरम्यान न्यायमूर्ती लळित यांनी मुख्य न्यायाधीश म्हणून ज्या तीन गोष्टींवर लक्ष केंद्रित केले जाईल त्याबद्दल सांगितले. ते म्हणाले की, न्यायालयातील खटल्यांची यादी सुलभ, स्पष्ट आणि पारदर्शक करणे यास प्राधान्य असेल.' याशिवाय विविध न्यायालयातील तातडीच्या प्रकरणांच्या सुनावणीला प्राधान्य देण्याचे आश्वासनही त्यांनी दिले आहे. तिसरे प्राधान्य म्हणून वर्षभरात किमान एक घटनापीठ काम करेल, यासाठी आम्ही सर्वतोपरी प्रयत्न करु, असे ते म्हणाले.

तत्पूर्वी, शुक्रवारी निवृत्त सरन्यायाधीश एनव्ही रमणा (CJI NV Ramana) म्हणाले की, 'संविधान (Constitution) आणि कायदा सामान्य लोकांच्या परिचयाचा करणे हे आपले घटनात्मक कर्तव्य आहे. तसेच, लोकांना न्यायव्यवस्थेबद्दल जागरुक करा आणि आत्मविश्वास निर्माण करा. ते पुढे म्हणाले की, 'आजही लाखो लोक दडपणाखाली जगत आहेत. या लोकांना वेळीच न्यायालयीन मदतीची गरज आहे.'