कर्नाटकचे मुख्यमंत्री पुन्हा बदलणार का? अमित शहांच्या दौऱ्यावरुन चर्चांना आलं उधान

कर्नाटकातील राजकारण पुन्हा एकदा तापू लागलं आहे. राज्यात भाजपकडून नेतृत्व बदल होऊ शकतो, अशी अफवा अमित शहांच्या दौऱ्यादरम्यान उडवण्यात आली. 9 महिन्यांपूर्वीच बसवराज बोम्मई (Basavaraj Bommai) यांना राज्याची कमान देण्यात आली होती.

दरम्यान, पक्षाचे राष्ट्रीय सरचिटणीस बीएल संतोष यांनी माध्यमाशी बोलताना म्हटले होते की, ''दिल्ली (Delhi) आणि गुजरातप्रमाणेच (Gujarat) पक्षाच्या नेतृत्वात बदल घडवून आणण्याची क्षमता आहे. परंतु मी असे म्हणत नाही की, ते सगळीकडेच होईल, परंतु भाजप असे निर्णय घेण्यास सक्षम आहे. ज्याची इतर राजकीय पक्ष कल्पनाही करु शकत नाहीत.''

तसेच, बोम्मई यांनी बीएस येडियुरप्पा यांची जागा घेतल्यानंतर कर्नाटकात आणखी एक बदल होण्याची शक्यता असल्याच्या वृत्तानंतर पक्षाच्या सरचिटणीसांनी हे वक्तव्य आले आहे. मात्र, या संपूर्ण प्रकरणावर मुख्यमंत्री बोम्मई यांच्याकडून अद्याप कोणतेही वक्तव्य आलेले नाही. मिळालेल्या माहितीनुसार, ते आपल्या मंत्रिमंडळात बदल करण्याच्या तयारीत आहेत.