Indian Army Truck Catches Fire: पूंछमध्ये भीषण अपघात, लष्कराच्या ट्रकवर कोसळली वीज; 3-4 जवानांच्या मृत्यूची भीती

Sky Lightning on Army Truck: जम्मू-काश्मीरच्या पूंछमध्ये गुरुवारी एक मोठी दुर्घटना घडली. वीज पडल्याने राष्ट्रीय महामार्गावर लष्कराच्या ट्रकने पेट घेतला. या दुर्घटनेत 3-4 जवान शहीद झाल्याचे सांगण्यात येत आहे. ट्रकवर वीज कोसळली तेव्हा ते जम्मू-पुंछ महामार्गावरुन भाटा ढड्या परिसरातून जात होते.

अधिकृत सूत्रांनी दिलेल्या माहितीनुसार, ट्रकमध्ये 10-12 जवान होते. ट्रकवर वीज पडल्यानंतर ट्रकने पेट घेतला आणि त्यात बसलेले जवान जळून खाक झाले. जखमी जवानांना रुग्णालयात (Hospital) दाखल करण्यात आले आहे.

मिळालेल्या माहितीनुसार, लष्कराच्या या वाहनात शस्त्राशिवाय डिझेलही होते, त्यामुळे आग आणखी भडकली. हा अपघात झाला त्यावेळी परिसरात पाऊस सुरु होता, मात्र तरीही ट्रकची आग आटोक्यात येऊ शकली नाही.

तसेच, लष्कर आणि पोलीस (Police) अधिकारी घटनास्थळी पोहोचले असून आग विझवण्याचे प्रयत्न सुरु आहेत. या घटनेबाबत लष्कराकडून अद्याप कोणतेही वक्तव्य आलेले नाही.

या प्रकरणाची चौकशी करण्यात येत आहे. या घटनेचा एक व्हिडिओही समोर आला आहे, ज्यामध्ये लष्कराचे वाहन जळताना दिसत आहे. शेजारुन जाणारे लोक आग विझवण्यास मदत करताना दिसले.

येथे व्हिडिओ पाहा