"त्याने पाणी मागितले होते" अपघातानंतर जनरल बिपिन रावतांना पाहिलं; प्रत्यक्षदर्शींचा दावा

तामिळनाडूच्या (Tamil Nadu) निलगिरी हिल्समध्ये बुधवारी हेलिकॉप्टर अपघात झाला, ज्यामध्ये सीडीएस जनरल बिपिन रावत (CDS General Bipin Rawat) आणि त्यांच्या पत्नीसह 13 जणांना प्राण गमवावे लागले. प्रत्यक्षदर्शींनी माध्यमाशी संवाद साधताना दुर्घटनेविषयी सांगितले. दरम्यान, शिव कुमार (Shiv Kumar) हा ठेकेदार आपल्या भावाला भेटण्यासाठी जात असताना बुधवारी दुपारी निलगिरीतील कुन्नूरजवळ हेलिकॉप्टर कोसळले. तो चहाच्या बागेत काम करतो. शिव कुमार यांचा दावा आहे की, मी हवाई दलाचे हेलिकॉप्टर पडताना आणि आगीच्या भक्ष्यस्थानी पडताना पाहिले. त्यानंतर मी तात्काळ सहकाऱ्यांसोबत घटनास्थळी पोहोचलो.

दरम्यान, शिवकुमारने माध्यमाशी बोलताना सांगितले की, आम्ही तीन जणांना पडताना पाहिले. त्यापैकी एक जिवंत होता. त्याने पाणी मागितले. ज्यावेळी तीन तासांनंतर कोणीतरी शिवकुमारला चीफ ऑफ डिफेन्स स्टाफचा यांचा फोटो दाखवला तेव्हा त्याने सांगितले की, मी ज्या व्यक्तीशी बोलत होतो ते जनरल बिपिन रावत होते.

त्यानंतर, शिवकुमार अश्रू ढाळत म्हणाले की, या माणसाने देशासाठी इतकं केलं आणि त्यांना पाणीही देऊ शकत नाही, यावर माझा विश्वास बसत नाही. मी रात्रभर झोपू शकलो नाही." जनरल बिपिन रावत यांचा रुग्णालयात नेत असताना मृत्यू झाल्याची माहिती मिळाली. संरक्षण मंत्री राजनाथ सिंह यांनी संसदेत सांगितले की, अपघाताच्या चौकशीचे आदेश देण्यात आले आहेत.

शिवाय, CDS जनरल बिपिन रावत आणि त्यांच्या पत्नीचे पार्थिव आज दिल्लीत आणले जाणार आहे. शुक्रवारी त्यांच्यावर अंत्यसंस्कार होणार आहेत. संरक्षण मंत्री राजनाथ सिंह यांनी आज संसदेच्या दोन्ही सभागृहात जनरल बिपिन रावत आणि इतर सैनिकांच्या मृत्यूवर वक्तव्य केले. या घटनेच्या उच्चस्तरीय चौकशीचे आदेश देण्यात आल्याचे संरक्षणमंत्र्यांनी सांगितले. ते पुढे म्हणाले की, सर्वांवर पूर्ण लष्करी सन्मानाने अंत्यसंस्कार केले जातील. त्यानंतर दोन्ही सभागृहात मौन पाळून शहीद जवानांना श्रद्धांजली वाहण्यात आली.