Gujarat ATS Drug Seizure: अरबी समुद्रात 3 हजार कोटींचे ड्रग्स जप्त! इराणच्या जहाजातून 526 किलो अमलीपदार्थ, पाकिस्तानचे 5 तस्कर ताब्यात

अहमदाबाद: भारतीय तटरक्षक दल आणि गुजरात ‘एटीएस’ यांनी अरबी समुद्रात लक्षद्वीपजवळ संयुक्त कारवाई करत इराणच्या एका जहाजावरून ५२६ किलोचे अमलीपदार्थ जप्त केले. काळ्या बाजारात या अमलीपदार्थांची किंमत तीन हजार कोटी रुपयांहून अधिक आहे.

या जहाजावरील पाकिस्तानच्या पाच तस्करांना ताब्यात घेण्यात आले आहे. ही कारवाई २५ सप्टेंबरला केल्याचे तटरक्षक दलाने आज प्रसिद्ध केलेल्या निवेदनात स्पष्ट केले. ‘एटीएस’च्या गुप्तचरांनी दिलेल्या माहितीच्या आधारावर तटरक्षक दलाने अरबी समुद्रात जहाज आणि हेलिकॉप्टरद्वारे शोधमोहिम सुरू केली.

लक्षद्वीपच्या पश्‍चिम किनाऱ्याजवळ एक संशयास्पद जहाज आढळताच त्यांनी जहाजाचा पाठलाग करत त्यावर नियंत्रण मिळविले. या जहाजावर तपास केला असताना मेथाम्फिटामाइन आणि हेराइन या अमलीपदार्थांचा मोठा साठा आढळला.