शिक्षक भरती घोटाळा: मंत्री पार्थ चॅटर्जींना दोन दिवसांची ED कोठडी

Bengal Minister Partha Chatterjee & Arpita Mukherjee: कथित शिक्षक भरती घोटाळ्याच्या चौकशीप्रकरणी अटकेनंतर अंमलबजावणी संचालनालयाने ( ED) शनिवारी पश्चिम बंगालचे उद्योग आणि वाणिज्य मंत्री पार्थ चॅटर्जी (Bengal Minister Partha Chatterjee) यांना कोलकाता येथील बँकशाल न्यायालयात हजर केले. न्यायालयाने चॅटर्जी यांना दोन दिवसांची ईडी सुनावली.

तर दुसरीकडे, चॅटर्जी यांच्यानंतर त्यांची सहकारी अर्पिता मुखर्जीलाही (Arpita Mukherjee) अटक करण्यात आली आहे. अर्पिता यांच्या घरी 21 कोटींची रोकड मिळाली होती. नोटा मोजण्यासाठी बँकांकडून (Banks) मशिन मागवण्यात आल्या होत्या.

दरम्यान, पार्थ चॅटर्जी हे ममता बॅनर्जी (Mamata Banerjee) सरकारमधील एक दिग्गज मंत्री आहेत. चॅटर्जी कथित घोटाळ्याच्या वेळी राज्याचे शिक्षण मंत्री होते. सुमारे 26 तासांच्या चौकशीनंतर ईडी अधिकाऱ्यांनी त्यांना अटक केली. न्यायालयाने (Court) पार्थ चॅटर्जी यांना दोन दिवसांची ईडी कोठडी सुनावली आहे.

अर्पितालाही अटक

पार्थ चॅटर्जी यांच्या अटकेनंतर तपास यंत्रणेने काल रात्री सहकारी अर्पिता मुखर्जी यांच्या घरावर छापा टाकला होता. यावेळी अर्पिता यांच्या घरातून 21 कोटींची रोकड जप्त करण्यात आली. या रकमेत 500 आणि 2000 च्या नोटा होत्या. त्यानंतर अर्पिता यांनाही अटक करण्यात आल्याची माहिती ईडीच्या (ED) सूत्रांकडून मिळाली आहे. त्यांच्यावर मनी लाँड्रिंगचा आरोप आहे. त्यांना न्यायालयात हजर करण्यात येणार आहे. मुखर्जी यांच्या घरातून सुमारे 20 मोबाईल फोन आणि काही कागदपत्रेही जप्त करण्यात आली आहेत.

नोटा नेण्यासाठी ट्रक आणावा लागला

मिळालेल्या माहितीनुसार, ईडीने काल संध्याकाळी अर्पिता मुखर्जी यांच्या घरावर छापा टाकला. या छाप्यात 21 कोटींची रक्कम जप्त करण्यात आली. नोटा मोजण्यासाठी बँकेतून मशिन मागवण्यात आल्या. आतापर्यंत 21.20 कोटींची रोकड जप्त करण्यात आली आहे. इतकंच नाही तर ईडीच्या अधिकाऱ्यांना नोटा घेऊन जाण्यासाठी ट्रक बोलवावा लागल्याच्या बातम्या येत आहेत. या नोटा बॉक्समध्ये भरुन नेल्या जात आहेत.