दिल्लीमध्ये भरधाव डंपर आणि प्रवाशांनी भरलेल्या ऑटो रिक्षामध्ये झालेल्या भीषण अपघातात नवजात बालिकेसह तीन जणांचा मृत्यू झाला आहे. या दुर्घटनेत अन्य पाच जण गंभीर जखमी झाले असून, त्यांच्यावर रुग्णालयात उपचार सुरू आहेत. पूर्व दिल्लीतील सोनिया विहार परिसरात बुधवारी रात्री ही घटना घडली. अपघाताची माहिती मिळताच पोलिसांनी घटनास्थळी धाव घेतली. स्थानिक नागरिकांच्या मदतीने जखमींना तातडीने रुग्णालयात दाखल करण्यात आले. या दुर्घटनेत अवघ्या तीन वर्षांची एक चिमुकली सुखरूप बचावल्याने आश्चर्य व्यक्त केले जात आहे.
मिळालेल्या माहितीनुसार, सोनिया विहारमधील पुस्ता क्रमांक ५ येथे बुधवारी रात्री हा अपघात झाला. प्रवाशांनी भरलेला ऑटो आणि डंपर यांची समोरासमोर जोरदार धडक झाली. संबंधित ऑटो मानेसरच्या दिशेने येत होता, तर डंपर सभापूर गावाच्या बाजूने येत होता. याचदरम्यान दोन्ही वाहनांची एकमेकांना जोरदार धडक बसली. धडक इतकी भीषण होती की ऑटोमधील प्रवाशांना गंभीर दुखापती झाल्या. अपघातानंतर परिसरात एकच गोंधळ उडाला.
या दुर्घटनेनंतर पोलिसांनी आणि स्थानिक नागरिकांनी तातडीने मदतकार्य सुरू केले. ऑटोमधील जखमींना बाहेर काढून उपचारासाठी जग प्रवेश चंद्र रुग्णालयात नेण्यात आले. मात्र, डॉक्टरांनी दोन अज्ञात पुरुष आणि एका नवजात बालिकेला मृत घोषित केले. या अपघातात एकूण तिघांचा जीव गेला आहे. मृत व्यक्तींची ओळख पटवण्याचे कामही पोलिसांकडून सुरू करण्यात आले आहे.
अपघातात राजा (३२) आणि राखी (३०) यांच्यासह एकूण पाच जण जखमी झाले आहेत. त्यांना तातडीने रुग्णालयात दाखल करण्यात आले असून, वैद्यकीय पथकाकडून उपचार सुरू आहेत. या दुर्घटनेतील विशेष बाब म्हणजे ऑटोमध्ये असलेली तीन वर्षांची चिमुकली मात्र सुखरूप बचावली. एकाच वाहनातील प्रवाशांवर काळाने घाला घातला असताना या लहान मुलीचा जीव वाचल्याने परिसरातून हळहळ व्यक्त होत आहे.
घटनेची माहिती मिळताच पोलीस आणि अग्निशमन दलाला पाचारण करण्यात आले होते. मात्र, अग्निशमन दलाचे पथक घटनास्थळी पोहोचण्यापूर्वीच पोलिसांनी आणि स्थानिक नागरिकांनी जखमींना रुग्णालयात हलवले होते. त्यामुळे तातडीने उपचार सुरू करणे शक्य झाले. अपघातानंतर परिसरात काही काळ वाहतुकीवरही परिणाम झाला.
या प्रकरणी सोनिया विहार पोलीस ठाण्यात गुन्हा दाखल करण्यात आला आहे. अपघातात सहभागी असलेल्या डंपरचा क्रमांक DL-1LY-5990, तर ऑटोचा क्रमांक DL-1RAB-5531 असल्याची माहिती पोलिसांनी दिली आहे. दोन्ही वाहनांची समोरासमोर धडक नेमकी कोणत्या कारणामुळे झाली, याचा तपास सुरू आहे. वाहनांचा वेग, चालकांची चूक किंवा अन्य तांत्रिक कारणे यांसह सर्व शक्यतांचा तपास केला जात आहे. या दुर्घटनेमुळे दिल्लीतील रस्ते सुरक्षेचा प्रश्न पुन्हा ऐरणीवर आला आहे.
दैनिक गोमंतकचे सदस्य व्हा
शॉपिंगसाठी 'सकाळ प्राईम डील्स'च्या भन्नाट ऑफर्स पाहण्यासाठी क्लिक करा.
Read Goa news in Marathi and Goa local news on Tourism, Business, Politics, Entertainment, Sports and Goa latest news in Marathi on Dainik Gomantak. Get Goa news live updates on the Dainik Gomantak Mobile app for Android and IOS.