Chittoor Road Accident Friday Night: भाविकांनी गजबजलेल्या तिरुमला तिरुपतीकडे जाणाऱ्या वारंगलमधील एका कुटुंबावर काळाने भीषण घाला घातला. आंध्र प्रदेशातील चित्तूर जिल्ह्यात शुक्रवारी (27 मार्च) मध्यरात्री झालेल्या एका भयानक रस्ते अपघातात पती, पत्नी आणि त्यांच्या 16 वर्षीय मुलीचा जागीच मृत्यू झाला. बंगळुरु राष्ट्रीय महामार्गावर पलमाकुलपल्ली गावाजवळ हा अपघात घडला, जेव्हा वेगात असलेली कार रस्त्याच्या कडेला उभ्या असलेल्या एपीएसआरटीसी बसला मागून धडकली. या अपघातात कारचा अक्षरशः चक्काचूर झाला असून एका सुखी कुटुंबाचा प्रवास अर्धवट राहिला.
पोलिसांनी दिलेल्या माहितीनुसार, 46 वर्षीय श्रीधर राव, त्यांची 40 वर्षीय पत्नी लक्ष्मी आणि 16 वर्षांची मुलगी अद्विका अशी मृतांची नावे आहेत. हे कुटुंब मूळचे तेलंगणातील वारंगल येथील रहिवासी होते. हे सर्वजण बंगळुरुहून तिरुमला येथे भगवान व्यंकटेश्वराच्या दर्शनासाठी निघाले होते. ज्या बसला कारने धडक दिली, ती बस पलामानेरकडून पुत्तूरच्या दिशेने जात होती आणि अपघाताच्या वेळी ती काही कारणास्तव महामार्गाच्या कडेला उभी होती. भरधाव वेगाने येणाऱ्या कारने बसला इतकी जोरदार धडक दिली की कारचा पुढचा भाग बसच्या खाली घुसला.
अपघाताचा (Accident) आवाज ऐकून स्थानिक नागरिक मदतीसाठी धावले, मात्र धडक इतकी भीषण होती की कारमधील तिन्ही प्रवाशांचा जागीच मृत्यू झाला. स्थानिक पोलिसांनी तातडीने घटनास्थळी धाव घेत मृतदेह बाहेर काढले आणि शवविच्छेदनासाठी बंगरुपालेम येथील शासकीय रुग्णालयात पाठवले. क्रेनच्या सहाय्याने अपघातग्रस्त कार रस्त्यावरुन बाजूला हटवण्यात आली. प्राथमिक तपासानुसार, कारचा अतिवेग आणि चालकाला आलेली डुलकी किंवा थकवा हे या भीषण अपघाताचे मुख्य कारण असावे, असा संशय पोलिसांनी व्यक्त केला आहे.
या घटनेमुळे वारंगलमध्ये शोककळा पसरली आहे. महामार्गावर उभ्या असलेल्या वाहनांमुळे होणारे अपघात ही एक मोठी चिंतेची बाब बनली असून या प्रकरणी पोलिसांनी (Police) गुन्हा दाखल केला आहे. रात्रीच्या वेळी प्रवास करताना चालकांनी पुरेशी विश्रांती घेणे आणि वाहनाचा वेग मर्यादित ठेवणे किती गरजेचे आहे, हे या घटनेतून पुन्हा एकदा अधोरेखित झाले आहे. तिरुपती दर्शनाचे स्वप्न उराशी बाळगून निघालेल्या या कुटुंबाचा असा शेवट होणे अत्यंत क्लेशदायक ठरले आहे.
दैनिक गोमंतकचे सदस्य व्हा
शॉपिंगसाठी 'सकाळ प्राईम डील्स'च्या भन्नाट ऑफर्स पाहण्यासाठी क्लिक करा.
Read Goa news in Marathi and Goa local news on Tourism, Business, Politics, Entertainment, Sports and Goa latest news in Marathi on Dainik Gomantak. Get Goa news live updates on the Dainik Gomantak Mobile app for Android and IOS.