Chhattisgarh: धक्कादायक! जेवण करताना पोटच्या तीन मुलांना खाऊ घातले विष; आई-बापाचाही जीवन संपविण्याचा प्रयत्न

छत्तीसगड: कांकेर येथे एक धक्कादायक प्रकार उघडकीस आला आहे. आई – वडिलांनी पोटच्या तीन मुलांना विष खाऊ घातल्यानंतर स्वत: देखील जीवन संपविण्याचा प्रयत्न केला. कांकेर जिल्ह्यात शनिवारी (१४ जून) हा प्रकार उघडकीस आला. तीन मुलांचा मृत्यू झाला असून, आई – वडिलांची तब्येत चिंताजनक आहे.

 मिळालेल्या माहितीनुसार, पराळकोट गावात देवेंद्र बैरागी (वय ७०) यांनी शुक्रवारी रात्रीच्या वेळेस जेवण करत असताना दोन मुली जुतिका बैरागी (९), दिप्ती (१२) आणि मुलगा देवराज (६) यांना विष खाऊ घातले. यात तीनही मुलांचा मृत्यू झाला. यानंतर देवेंद्र आणि त्याची पत्नी यांनी देखील विष प्राशन करुन जीवन संपविण्याचा प्रयत्न केला. 

शेजाऱ्यांना हा प्रकार लक्षात आल्यानंतर त्यांनी देवेंद्र आणि त्याच्या पत्नीला उपाचारासाठी रुग्णालयात दाखल केले. पण, पती – पत्नीची तब्येत अद्याप चिंताजनक असल्याची माहिती समोर आली आहे.

मिळालेल्या प्राथमिक माहितीनुसार, बैरागी दाम्पत्य आर्थिक संकटाचा सामना करत होते. याच विंवचनेतून त्यांनी टोकाचे पाऊल उचलले असावे अशी शक्यता व्यक्त केली जात आहे. याबाबत पोलिस तपास सुरु आहे. दरम्यान, या घटनेमुळे परिसरात खळबळ निर्माण झाली आहे.