कार्यकर्ते लागले तयारीला...मुर्मूंचा विजय होताच दीड लाख गावांमध्ये भाजप करणार जंगी सेलिब्रेशन

President Election 2022: राष्ट्रपतीपदाच्या निवडणुकीत NDA उमेदवार द्रौपदी मुर्मू यांचा विजय जवळपास निश्चित आहे. एकीकडे भाजप आणि त्यांच्या मित्रपक्षांना द्रौपदी मुर्मू (Draupadi Murmu) यांच्या विजयावर विश्वास वाटत असतानाच, दुसरीकडे विरोधकांमध्ये फूट पडल्याने विरोधी उमेदवार यशवंत सिन्हा यांच्या विजयाची शक्यता कठीण झाली आहे. राष्ट्रपतीपदाच्या निवडणुकीत दौपदी मुर्मू यांच्या विजयाबद्दल भाजपला (BJP) एवढा विश्वास आहे की त्यांनी विजयोत्सवाची तयारी सुरू केली आहे.

मिळालेल्या माहितीनुसार भाजपने देशातील सुमारे 1 लाख तीस हजार आदिवासी गावांमध्ये दौपदी मुर्मूचा विजय साजरा करण्याची योजना आखली आहे. 21 जुलै रोजी राष्ट्रपतीपदाच्या निवडणुकीत दौपदी मुर्मूंचा विजय घोषित होताच भाजप जल्लोष करणार आहे. यासाठी देशभरातील 15 हजार मंडळांमध्ये उत्सव साजरा करण्याच्या सूचना भाजपकडून देण्यात आल्या आहेत. विजयाच्या उत्सवादरम्यान भाजपने कार्यकर्त्यांना केवळ दौपदी मुर्मूचे पोस्टर लावण्याच्या सूचना दिल्या आहेत.

यूपीमधील भाजप आमदारांना या सूचना देण्यात आल्या होत्या

18 जुलै रोजी राष्ट्रपतीपदाच्या निवडणुकीसाठी मतदान होणार आहे. त्यासाठी भाजपने तयारी पूर्ण केली आहे. मतदानाच्या दृष्टिकोनातून महत्त्वाच्या असलेल्या उत्तर प्रदेशातील भाजपच्या सर्व आमदारांना 16 जुलैपासून लखनऊमध्ये राहण्याच्या सूचना भाजपने दिल्या आहेत. 16 आणि 17 जुलै रोजी होणाऱ्या राष्ट्रपती निवडणुकीसाठी भाजप आपल्या आमदारांना प्रशिक्षण देणार आहे. याशिवाय भाजपने देशभरातील आपल्या आमदारांना मतदानाच्या दिवशी आपापल्या राज्यात मतदान करण्यासाठी उपस्थित राहावे, अशा कडक सूचना दिल्या आहेत.